Узви гурӯҳи “Раҳмон-Гитлер” ба муҳлати 15 сол аз озодӣ маҳрум гардид

Июнь 22, 2018 15:26

ДУШАНБЕ, 22.06.2018 /АМИТ «Ховар»/.  Узви фаъоли гурӯҳи Раҳмон бо тахаллуси “Гитлер” Назаров Фахриддин Шодибекович бо ҳукми Суди шаҳри Душанбе барои содир намудани ҷиноятҳои роҳзанӣ ва таҷовуз ба номус  ба муҳлати 15 сол аз озодӣ маҳрум гардид.

Парвандаи ҷиноятӣ дирӯз таҳти раисии муовини раиси Суди шаҳри Душанбе Асомуддин Бобохонзода баррасӣ шуд.

Тавре Асомуддин Бобохонзода ба хабарнигори АМИТ «Ховар» маълумот дод, дар ҷараёни тафтишоти пешакӣ ва мурофиаи судӣ муайян гардид, ки Фахриддин Назарови 43-сола,  зодаи шаҳри Душанбе аз соли 1998 то 2001 бо автомати «Калашников», таппончаи «Макаров» ва дигар силоҳи сард мусаллаҳ шуда, ҳангоми дар ҷойҳои доимии ҷойгиршавии худ, воқеъ дар деҳаи Меҳтарии Теппаи Самарқандии собиқ ноҳияи Ленин (ҳозира ноҳияи Рӯдакӣ) қарор доштан бо мақсади иҷрои нақшаҳои тарҳрезишуда ҳамчун узви фаъоли ин гурӯҳи мусаллаҳ фаъолият намудааст.

Роҳбари асосии гурӯҳи мазкур Самиҷон Ибодов ва аъзои гурӯҳи мазкур Баҳриддин Камолов бо тахаллуси Борис, Алиҷон Толибов, Ҷамшед Ҷаборов, Нурулло Зарипов бо тахалуси Нурка, Зубайдулло Гиёев, Раҳимҷон Содиқов, Ҳоким Шарипов, Шамсулло Сафаров ва шахсони ба тафтишот номаълум бо номҳои Анвар, Рашид, Азиз, Виктор бо тахаллуси Ислом, Юсуф бо тахаллуси Кобра, Холназар бо тахаллуси Холи Чоч, Мирзо Мақсад, Қобил, Хуршед, Раман, Чумчуқ, Ибод, Раҳматулло бо тахаллуси Аркадий, Раҷаб, Саидмурод, Мастак, Фазлиддин ва дигарон будаанд.

Ин гурӯҳи бо силоҳҳои сард мусаллаҳ дар ин давраҳо ба роҳзанӣ, тасарруфи амволи ғайр, одамкушӣ ва гаравгон гирифтани одамон машғул будааст.

Фахриддин Назаров низ чун узви фаъоли ин гурӯҳ дар ин давраҳо дар ҳудуди ноҳияи собиқ Ленин, ҳозира Рӯдакӣ ва шаҳри Душанбе дар содир намудани чунин ҷиноятҳо иштирок намудааст.

 

Июнь 22, 2018 15:26

Хабарҳои дигари ин бахш

Президенти Тоҷикистон ҳамоиши сатҳи олӣ — муаррифии Даҳсолаи байналмилалии барои илмҳои яхшиносӣ (криосферӣ)-ро ифтитоҳ намуданд
Дар Хуҷанд Мусобиқаи ҷумҳуриявӣ оид ба ҷудо байни наврасон ҷамъбаст гардид
Имрӯз дар шаҳри Душанбе ҳаво то 35 дараҷа гарм мешавад
ҚУРБИ АСЪОР: дар Тоҷикистон 1 рубли русӣ аз 0.1247 то 0.1240 сомонӣ муқаррар шудааст
Кишоварзони ноҳияи Восеъ дар гармхона бо усулҳои муосир маҳсулот парвариш мекунанд
Ваколатдор оид ба ҳуқуқи инсон вобаста ба ҳифзи ҳуқуқи соҳибкорон конфронси ҷумҳуриявӣ доир менамояд
Имрӯз дар шаҳри Душанбе ҳаво то 34 дараҷа гарм мешавад
Имсол дар Тоҷикистон беш аз 37 ҳазор метр корҳои соҳилмустаҳкамкунӣ гузаронида мешавад
Имрӯз дар ноҳияҳои алоҳидаи Тоҷикистон борони кӯтоҳмуддат меборад
Пешвои миллат: «Ҳамеша шукронаи соҳибватаниву соҳибдавлатӣ, сулҳу субот ва зиндагии орому осудаи худро ба ҷо оварем»
Имрӯз дар Тоҷикистон чангу ғубор ба амал меояд
Сергей Лебедев: «Қазоқистон аввалин мизбони Форуми волонтёрони Иттиҳоди Давлатҳои Мустақил мегардад»