«Зоопарк»-бо ин ном китоби нави нависандаи тоҷик Абдуғаффор Абдуҷаббор дар Санкт-Петербург ба нашр расид

ДУШАНБЕ, 08.06.2018 /АМИТ «Ховар»/. Китоби нави нависандаи тоҷик Абдуғаффор Абдуҷаббор таҳти унвони «Зоопарк» бо сифати баланд дар нашриёти «Первый план»-и шаҳри Санкт-Петербург интишор ёфт.

Маҷмӯа интихобан 20 резаҳикоя, қиссаи «Зоопарк» ва пйеса барои театрҳои лӯхтак- «Зодрӯзи рӯбоҳаки соддаяк»-ро фарогир аст.

Нависандаи рус, шореҳи мустақили адабиёт ва кино Анна Элвинская, Ҳунарпешаи шоистаи Россия Галина Бокашевская, рассоми машҳури ҷаҳонӣ Миша Ленн, муҳаққиқон Татяна Исабаева ва Мария Белостотская дар қисми пешгуфтори китоб зимни андешарониҳо ба эҷодиёти адиб ва шахсияти ӯ баҳои арзанда додаанд.

Маҷмӯа бо теъдоди 1000 нусха ба чоп расида, тарҷумаи онро ба забони русӣ Комиламо Камолова анҷом додааст.