Бозиҳои Осиё-2018: ҳайати дастаи мунтахаби Тоҷикистон оид ба кураш муайян шуд

ДУШАНБЕ, 27.07.2018 /АМИТ «Ховар»/. Дар Бозиҳои 18-уми Осиё, ки аз 18 август то 2 сентябри соли равон дар шаҳрҳои Ҷакарта ва Палембанги Индонезия баргузор мегарданд, дастаи мунтахаби Тоҷикистон оид ба кураш иштирок мекунад.

Тавре ба хабарнигори АМИТ «Ховар» аз Кумитаи миллии олимпии Тоҷикистон хабар доданд, дар  Бозиҳои 18-уми Осиё шарафи Ҷумҳурии Тоҷикистонро  паҳлавонони   шинохта дар намуди кураш Орифҷон Додов ва Баҳодур Ҳалимов дар вазни  -66 кг, Акмал Муродов ва Беҳрӯз Хоҷазода дар вазни -81 кг, Ҳоҷимашраб Раҳмонов ва Давлатшо Ғазалшо дар вазни -90 кг, Набимуҳаммад Хоркашев ва Саидҷалол Саидов дар вазни +90 кг  ҳимоя мекунанд.

Мусобиқа оид ба кураш 28-30 август дар шаҳри Ҷакарта доир мегардад. Мусобиқаи кураш дар 4 категорияи вазнӣ миёни мардон (-66 кг, -81 кг, -90 кг, +90 кг) ва 3 дараҷаи вазнӣ миёни занон (-52 кг, -63 кг, -78кг) баргузор мешавад. Варзишгарони мо дар ҳар 4 вазн миёни мардон ширкат мекунанд.

Гӯштини кураш бори аввал ба барномаи Бозиҳои тобистонаи Осиё ворид карда шудааст. Ин намуди варзиш ба барномаи Бозиҳои осиёии дохили толор ва ҳунарҳои размӣ ворид гардида буд, ки соли гузашта дар шаҳри  Ашқобод варзишгарони мо соҳиби як медали нуқра  (Беҳрӯз Хоҷазода дар вазни-73 кг)  ва ду нишони биринҷӣ (Фирдавс Насимов дар  вазни -100 кг, Хушқадам Хусравов  дар   вазни -66 кг)  гардида буданд.