Дар шаҳри Истиқлол ба муносибати 30-солагии Истиқлолият корхонаҳои нави истеҳсолӣ бунёд мешаванд

Июль 25, 2018 09:29

ХУҶАНД, 25.07.2018. /АМИТ «Ховар»/. Дар шашмоҳаи дуюми соли равон дар шаҳри Истиқлоли вилояти Суғд ду кӯдакистон ба истифода дода мешаванд. Ҳоло дар доираи иҷрои Барномаи ташаккули муассисаҳои томактабӣ дар кӯдакистони №8-и шаҳр, ки барои фарогирии 300 нафар кӯдакон пешбинӣ гардидааст, корҳои таъмиру навсозӣ ҷараён дошта, дар назар аст он аввали моҳи сентябр ба фаъолият шурӯъ намояд.

Ҳамзамон аз ҷониби Ширкати саноати кӯҳии «Тоҷикистону Хитой» низ як адад кӯдакистони нав барои 360 нафар тарбиятгиранда то охири соли равон ба истифода дода мешавад. 

Ин матлабро раиси шаҳри Истиқлол  Худойназар Амонзода  зимни баргузории нишасти хабарӣ 24 июл дар мақомоти иҷроияи ҳокимияти давлатии шаҳр  баён дошт.

Ба иттилои хабарнигори минтақавии АМИТ «Ховар», раиси шаҳр ҳамзамон зикр намуд, ки тибқи нақшаи мақомоти иҷроияи ҳокимияти давлатии шаҳр, соли равон дар маҳаллаи Меҳнатобод сохтмони мактаби шакли нав бо фарогирии 350 хонанда ба нақша гирифта шудааст. Дар айни замон барои бунёди мактаб қитъаи замин ҷудо гардида, корҳои лоиҳакашӣ идома доранд.

Вобаста ба таъминоти хонандагони муассисаҳои таълимӣ бо либоси мактабӣ барои соли хониши 2018-2019 гуфта шуд, ки аз ҷониби шуъбаи маорифи шаҳр ва 6 муассисаи таълимӣ бо КВД «Нури Ховар» барои омода намудани 1500 адад либоси мактабӣ шартнома баста шудааст.

Ҳамзамон иттилоъ дода шуд, ки яке аз масъалаҳои асосии шаҳр- ин таъминоти аҳолӣ бо оби тозаи ошомиданӣ ба ҳисоб рафта, ҳоло дар ин самт дар шаҳр дар асоси созишномаи Корхонаи воҳиди давлатии Хоҷагии манзилию коммуналии Ҷумҳурии Тоҷикистон ва Бонки аврупоии таҷдид ва рушд лоиҳаи инвеститсионии барқарорсозии системаи обтаъминкунии шаҳрҳои шимоли Тоҷикистон амалӣ шуда истодааст.

Дар нишаст дар масъалаи норасоии мутахассисон дар соҳаҳои гуногуни иҷтимоиву иқтисодии шаҳр гуфта шуд, ки имрӯз бештар мутахассисони соҳаи тандурустӣ, аз ҷумла духтурони тибби оилавӣ, сироятшинос, ҷарроҳ, равоншинос, дандонпизишк, духтур-озмоишгар намерасанд.

Ба иттилои раиси шаҳр, моҳи сентябри соли 2018 ба таъсиси шаҳри Истиқлол (собиқ Табошар) 80 сол пур мешавад. Аз ин лиҳоз мақомоти иҷроияи ҳокимияти давлатии шаҳр ҳамроҳ бо соҳибкорони маҳаллӣ тасмим доранд дар самти ободонӣ, таъмиру навсозӣ бештар саъю кӯшиш намуда, чанд иншооти иҷтимоӣ, чун сохтмони майдончаҳои варзишӣ, навсозии боғи фарҳангию истироҳатӣ ва варзишгоҳи марказии шаҳрро  ба роҳ монанд.

Инчунин баҳри сазовор истиқбол гирифтани 30-солагии Истиқлолияти давлатии Ҷумҳурии Тоҷикистон дар ҳудуди шаҳр бунёду навсозии беш аз 15  иншооти иҷтимоиву иқтисодӣ, аз ҷумла, сохтмони корхонаҳои истеҳсолӣ дар назар дошта шудааст.

Июль 25, 2018 09:29

Хабарҳои дигари ин бахш

Дар Хуҷанд Мусобиқаи ҷумҳуриявӣ оид ба ҷудо байни наврасон ҷамъбаст гардид
Имрӯз дар шаҳри Душанбе ҳаво то 35 дараҷа гарм мешавад
ҚУРБИ АСЪОР: дар Тоҷикистон 1 рубли русӣ аз 0.1247 то 0.1240 сомонӣ муқаррар шудааст
Кишоварзони ноҳияи Восеъ дар гармхона бо усулҳои муосир маҳсулот парвариш мекунанд
Ваколатдор оид ба ҳуқуқи инсон вобаста ба ҳифзи ҳуқуқи соҳибкорон конфронси ҷумҳуриявӣ доир менамояд
Имрӯз дар шаҳри Душанбе ҳаво то 34 дараҷа гарм мешавад
Имсол дар Тоҷикистон беш аз 37 ҳазор метр корҳои соҳилмустаҳкамкунӣ гузаронида мешавад
Имрӯз дар ноҳияҳои алоҳидаи Тоҷикистон борони кӯтоҳмуддат меборад
Пешвои миллат: «Ҳамеша шукронаи соҳибватаниву соҳибдавлатӣ, сулҳу субот ва зиндагии орому осудаи худро ба ҷо оварем»
Имрӯз дар Тоҷикистон чангу ғубор ба амал меояд
Сергей Лебедев: «Қазоқистон аввалин мизбони Форуми волонтёрони Иттиҳоди Давлатҳои Мустақил мегардад»
Сардори Хадамоти алоқа бо фаъолияти ширкати «МегаФон Тоҷикистон» шинос шуд