КӮДАКОН МЕВАИ ШИРИНИ УМРИ ИНСОНАНД: дар «Боғи кӯдакон»-и шаҳри Душанбе барномаи фарҳангӣ баргузор гардид

Июль 3, 2018 19:30

ДУШАНБЕ, 03.07.2018 /АМИТ «Ховар»/. Тавре иттилоъ додем, имрӯз, 3 июл Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо Раиси шаҳри Душанбе Рустами Эмомалӣ дар ноҳияи Исмоили Сомонӣ дар вазъияти тантанавӣ «Боғи кӯдакон»-ро мавриди баҳрабардорӣ қарор доданд.

Бегоҳии ҳамин рӯз  дар амфитеатри боғи мазкур, ки дорои 500 ҷойи нишаст мебошад, бо иштироки насли наврасу хушбахти даврони истиқлол ва сарояндагони маҳбуби онҳо барномаи фарҳангию фароғатӣ доир карда шуд.

Мухбири АМИТ «Ховар» иттилоъ медиҳад, ки пас аз ба истифода додани «Боғи кӯдакон», ки дар доираи ташаббуси бунёдкоронаю созандаи Пешвои миллат муҳтарам Эмомалӣ Раҳмон сурат гирифт, ҳазорон нафар насли навраси пойтахти мамлакат- шаҳри  Душанбе дар фазои сулҳу оромиши Ватан ва имкониятҳои дар ин боғ фароҳамовардашуда истироҳату фароғат ва шодию хурсандӣ мекарданд. Кӯдакон аз он хушҳол буданд, ки дар шаҳри азизамон бо иштироки бевоситаи Сарвари давлат муҳтарам Эмомалӣ Раҳмон боз як боғи нав ба истифода дода шуд.

Бояд гуфт, ки «Боғи кӯдакон» дар масоҳати қариб 3 гектар доман паҳн карда, дар он барои сайру саёҳат, истироҳат ва иштирок дар чорабиниҳои варзишию фарҳангии кӯдакон амфитеатр бо 500 ҷойи нишаст, фаввораҳо, гулгаштҳо, майдончаҳои варзишӣ, корти теннис, ҷойи махсус барои бозии шоҳмот, қаҳвахона ва дигар иншоот сохта шудаанд.

Инчунин барои гашту гузор дар дохили боғ роҳравҳо дар масоҳати 5200 метри мураббаъ аз тахтасангҳои гуногунранг сохта шудаанд. Дар ҳудуди боғ зиёда аз 120 адад курсии гуногуншакл насб карда шудаанд.

Ғайр аз ин вақте ки кас шабона вориди боғ мешавад, ҳаловати тозае хоҳад гирифт, зеро барои равшаннамоии боғ чароғакҳои равшанидиҳандаи баландиашон ҳархела бо 30 адад прожектор гузошта шудаанд.

Бояд гуфт, ки дар ҳудуди боғ барои дилхушии кӯдакон 115 адад чархофалакҳои гуногун аз Туркия ва Италия, 40 адад бозичаҳои афсонавии гуногун, ба монанди сангпушт, оҳу, бузаки ҷингилапо бо гург, санҷоб, кабк, товус, хирс, гург ва заргӯш аз филмҳои тасвирӣ ҷойгир карда шудаанд.

Ёдовар мешавем, ки   зимни ифтитоҳи «Боғи кӯдакон» Президенти мамлакат муҳтарам Эмомалӣ Раҳмон бо корҳои анҷомёфта ва ободонии ҳудуди он шинос шуданд. Сарвари давлат ба корҳои анҷомдодашуда баҳои баланд дода, дастур доданд, ки барои солҳои зиёд ба мардум хизмат расонидани ин боғ талош варзанд.

Июль 3, 2018 19:30

Хабарҳои дигари ин бахш

Таҳти унвони «Эмомалӣ Раҳмон — ҳомии сулҳ ва Ваҳдати миллӣ» конференсияи ҷумҳуриявӣ доир шуд
Занону модарони собиқадор бо сарбозон ва сокинони Варзоб, Файзобод, Рӯдакӣ ва Шаҳринав мулоқот намуданд
Дар Донишгоҳи давлатии Бохтар вобаста ба амнияти иттилоотӣ конференсияи ҷумҳуриявӣ баргузор шуд
Дар Хатлон бо сабаби надонистани қоидаҳои оббозӣ ва бетаваҷҷуҳии волидон 48 ҳолати ғарқшавӣ ба қайд гирифта шуд
МЕГАФОН ТОҶИКИСТОН: Кӯдаконро дар тобистон бо чӣ метавон банд кард?
Имрӯз дар шаҳри Душанбе ҳаво то 39 дараҷа гарм мешавад
Дар Турсунзода беш аз 6 ҳазор ҳолати вайронкунии қоидаҳои ҳаракат дар роҳ ошкор гардид
Дар даври дуюми Озмуни ҷумҳуриявии «Тоҷикистон-Ватани азизи ман» 2676 довталаб иштирок менамояд
Дар Кӯлоб омодагии мудофиаи ҳудудӣ ва захираҳои сафарбарӣ мавриди омӯзиш ва санҷиш қарор гирифт
ТАЪТИЛИ ТОБИСТОНА. Дар Зафаробод 1530 нафар хонанда ба истироҳат фаро гирифта мешавад
Имрӯз дар водиҳои Тоҷикистон ҳаво то 40 дараҷа гарм мешавад
Абдусалом Назаров дар боғаш 12 навъи зардолу парвариш менамояд