Маросими пӯшидашавии Рӯзҳои шаҳри Душанбе дар толори театри «Санкт-Петербург Опера» баргузор гардид

ДУШАНБЕ, 20.07.2018. /АМИТ «Ховар»/. Аз  12 то 14  июли соли 2018 дар толори Театри «Санкт-Петербург Опера»-и шаҳри Санкт-Петербурги Федератсияи Россия Рӯзҳои  шаҳри Душанбе баргузор гардиданд.

Тавре аз Раёсати иттилоот ва робитаҳои хориҷии дастгоҳи Раиси шаҳри Душанбе ба АМИТ «Ховар» хабар доданд, дар ин маросим  намояндагони Мақомоти иҷроияи ҳокимияти давлатии шаҳри Душанбе ва маъмурияти шаҳри Санкт-Петербург, дӯстдорони савту навои рӯҳбахши тоҷикӣ, сокинони касбу кори гуногун ва намояндагони Ҷамъияти  тоҷикони шаҳри Санкт-Петербург иштирок доштанд.

Дар ин барномаи рангини фарҳангӣ суруду тарона ва рақсу навоҳои дилнишини тоҷикӣ пешкаши санктпетербургиҳо гардид. Устодони санъат, эҷодкорони ҷавон ва намояндагони аҳли ҳунари шаҳри Душанбе бо ҳунари воло  дили ҳозиринро тасхир карданд ва онҳо  ин барномаро  бо кафкӯбиҳои  бардавом истиқбол  намуданд.

Ба ҳозирин ҳунари волою санъати баланди иҷрокунандагӣ ва овозхонии ҳунармандони шоиста ва ҷавони тоҷик Шарофат Усмонова  ва Амирҷон Рӯзиев дар пешниҳоди ария ва романсҳо аз эҷодиёти бастакорони маъруфи ҷаҳон, рақсҳои ҷаззоби ҳунарпешагони балет Муҳаммад Азимзода ва Фарангис Қосимова зимни иҷрои порчаҳо аз балети «Зол ва Рудоба» — и Шӯҳрат Ашӯров, ҳунари волои навозандаи ҷавон Рафоат Шоазимова, ки дар фазои толори театр танинандоз гардид, хеле писанд омада, қалби ҳар як бинандаву шунавандаро ба ваҷд овард.

Барномаи фарҳангӣ бо пешниҳоди сурудҳои ҳунарпешаи ҷавон Зафар Абдуалимов, ки як навъ омезиши санъати имрӯзаи Шарқу Ғарб маҳсуб меёбад, ҷамъбаст гардид.

Дар маҷмӯъ, барномаи фарҳангие, ки аз ҷониби ҳунармандони тоҷик баҳри ҳаводорони санъати мусиқии шаҳри Санкт-Петербург пешниҳод гардид, ба ҷашни ҳақиқии дӯстиву якдилии ин ду бародаршаҳр табдил ёфт.

Ёдовар мешавем, ки  ҳайати шаҳри Душанбе давоми ду рӯз дар Санкт-Петербург як зумра суҳбату мулоқот анҷом дода, бо фаъолияти марказҳои тиббӣ, фарҳангӣ, корхонаҳои саноатӣ, муассисаҳои коммуналӣ ва хизматрасонии шаҳр шинос шуд.

Ҳайати расмии шаҳри Душанбе таҳти роҳбарии муовини аввали Раиси шаҳри Душанбе Маҳмадсаид Зувайдзодаро ноиби Губернатори шаҳри Санкт- Петербург Сергей Мовчан ба ҳузур пазируфт.

Дар мулоқот масоили вобаста ба муносибатҳои дӯстонаи бародаршаҳрӣ ва ҳамкории судманд миёни Душанбе ва Санкт-Петербург мавриди баррасӣ қарор гирифтанд.

Нимаи дуюми рӯзи 12 июли соли 2018 дар Маркази рушд ва дастгирии соҳибкорӣ маросими расмии ифтитоҳи Рӯзҳои шаҳри Душанбе дар шаҳри Санкт — Петербург баргузор гардид. Дар он намояндагони  Мақомоти иҷроияи ҳокимияти давлатии шаҳри Душанбе ва Маъмурияти Санкт-Петербург иштирок доштанд.

Дар ин маросим ҳозирин бо  ҳолати иҷтимоию иқтисодии шаҳри Душанбе шинос гардиданд.

Баъди шиносоӣ бо имконоту шароити ҳамкорӣ бо шаҳри Душанбе ҳайатҳои ҳар ду ҷониб доир ба тақвияти равобит дар соҳаҳои иқтисоду тиҷорат, меҳнат ва шуғли аҳолӣ, муҳоҷират, тандурустӣ, хӯроки иҷтимоӣ, нақлиёту коммуникатсия, хизматрасониҳои коммуналӣ ва сохтмону меъморӣ мубодилаи афкор карданд.

Дар доираи Рӯзҳои шаҳри Душанбе мулоқоти соҳибкорони шаҳри Душанбе ва шаҳри Санкт-Петербург баргузор гардид, ки зимни  вохӯрӣ ҷонибҳо оид ба роҳ мондани ҳамкории самарабахш ва омӯзиши таҷрибаи якдигар мубодилаи афкор карданд. Соҳибкорони ҳар ду шаҳр ҷиҳати ба роҳ мондани тиҷорати дуҷониба ва мубодилаи молу маҳсулот ҳавасмандии худро изҳор доштанд.

Рӯзи 13 июли соли 2018  ҳайати расмии шаҳри Душанбе ба Маҷмааи таърихӣ-ёдгории Қабристони Пискарёв ташриф оварда, бо арҷгузорӣ ба хизматҳои барҷаста ва ҷоннисориҳои муҳофизони шаҳри Ленинград дар Ҷанги дуюми ҷаҳони  солҳои 1941-1945 гулчанбар гузоштанд.

Дар маросими гулгузорӣ ҳайати расмии шаҳри Душанберо ноиби Губернатори шаҳри Санкт-Петербург Сергей Мовчан ва дигар шахсони расмӣ ҳамроҳӣ намуданд.

Зимни ташриф ба ин оромгоҳ ҳайати расмии шаҳри Душанбе дар назди лавҳаи ёдгории сарбозони Тоҷикистон, ки баҳри ҳимояи Ленинград ҷони худро аз даст додаанд, гулчанбар гузошта, хотираи онҳоро  пос доштанд.

Маврид ба зикр аст, ки баҳри аз муҳосира озод намудани шаҳри Ленинград, ки аз 8 сетябри соли 1941 то 27 январи соли 1944 идома ёфтааст, дар сафи Артиши Шӯравӣ садҳо нафар шаҳрвандони Тоҷикистон қаҳрамониҳои бемислу монанд нишон дода, дар ҳамин мазор ба хок супурда шудаанд.

Дар ҷараёни боздид ҳайати шаҳри Душанбе ҳамчунин аз осорхонаи оромгоҳи Пискарёв дидан намуда, дар китоби меҳмонони ифтихорӣ соядаст гузошт.

Ҳайати расмии шаҳри Душанбе ҳамчунин  бо  Консули генералии Ҷумҳурии Тоҷикистон дар Санкт-Петербург Д. Назризода ва бо намояндагони Ҷамъияти тоҷикони муқими вилояти Ленинград мулоқот карданд.

Зимни мулоқот ва суҳбати  ошкорову самимӣ бо ҳамватанони бурунмарзӣ оид ба  ҷанбаҳои гуногуни фаъолияту зиндагии тоҷикони муқими шаҳри Санкт —  Петербург ва муҳоҷирони кории Ҷумҳурии Тоҷикистон, инчунин таҳсилу таълими донишҷӯёни тоҷик мавриди гуфтугӯ қарор гирифт.

Дар мулоқот барои боз ҳам беҳтар гардидани шароити будубош ва  фаъолияти муҳоҷирони меҳнатии тоҷик дархосту пешниҳодҳои судманд ироа гардиданд.

Ҳайати расмии шаҳри Душанбе аз осорхонаи маъруфи Эрмитажи шаҳри  Санкт-Петербург дидан намуд. Осорхонаи Эрмитаж, ки дар он ҳазорҳо расму мусаввараҳои рассомон ва наққошони ҷаҳонӣ ва осори таърихии гаронбаҳо ба намоиш гузошта шудааст, яке аз ҷойҳои ҷолибтарини  шаҳр барои сайёҳони хориҷӣ ва дӯстодорони санъату ҳунари воло  маҳсуб мешавад.

Бояд зикр кард, ки  Рӯзҳои шаҳри Душанбе дар Санкт-Петербург дар таҳкиму густариши муносибатҳои бародаршаҳрӣ ва ҳамкории гуногунҷанба миёни Душанбе ва Санкт- Петербург саҳифаҳои нав боз намуда,  баҳри   дарёфти  самту усулҳои тоза ва муайян кардани уфуқҳои нави ҳамкорӣ  заминаи муътамад фароҳам оварданд.

Ёдовар мешавем, ки  миёни  шаҳри Санкт-Петербурги Федератсияи Россия ва  шаҳри Душанбе    соли 1991 паймони бародаршаҳрӣ  баста шудааст.

Шаҳри Санкт-Петербурги Федератсияи Россия яке аз бародаршаҳрҳои фаъол миёни дигар бародаршаҳрҳои Душанбе мебошад, ки сол то сол ҳамкории мутақобилан судманди онҳо густариш меёбад.

Байни Мақомоти иҷроияи ҳокимияти давлатии шаҳри Душанбе ва шаҳрдории Санкт-Петербург дар бораи ҳамкории тиҷоратӣ-иқтисодӣ, илмӣ-техникӣ ва фарҳангӣ созишномаҳо ба имзо расиданд.