Сунатулло Исроилов дар иёлати Ню – Ҷерсии ИМА ғолиби мусобиқаи теннис гардид

ДУШАНБЕ, 11.07.2018 /АМИТ «Ховар»/. Варзишгари маъруфи тоҷик Сунатулло Исроилов дар  Мусобиқаи теннис барои дарёфти Ҷоми Ассотсиатсияи  тенниси ИМА дар иёлати Ню – Ҷерси  ғолиби ҷои аввал гардид.

Тавре аз Кумитаи кор бо ҷавонон ва варзиши назди Ҳукумати Ҷумҳурии Тоҷикистон ба АМИТ «Ховар» хабар доданд, мусобиқаи мазкур аз  6 то 9 июли соли равон доир шуда, дар он  32 варзишгари маъруфи ҷаҳон байни ҳам рақобат намуданд.

Сунатулло Исроилов дар сабқати аввал бо варзишгари  маъруфи Ҳиндустон Ховард Шерман, дар сабқати дуюм бо варзишгари Украина Пётр Гремлич, дар даври сеюм бо варзишгари Амрико Кевин Ллинитс бозӣ карда, маҳорати баланди касбӣ нишон дод ва ба даври нимфиналӣ роҳ  ёфт.

Дар даври нимфиналӣ Сунатулло Исроилов бар варзишгари Германия Прозанно Фернандо ғолиб омада, дар бозии финалӣ бо варзишгари Амрико тибқи ҳисоби 6/1, 6/3 сазовори ҷои аввал гардид.

Мавриди зикр аст, ки Сунатулло Исроилов се маротиба дар мусобиқаи мазкур дар иёлатҳои Флорида, Ню – Ҷерсӣ ва Ню – Йорки Амрико иштирок намуда, сазовори ҷои аввал мегардад.

Сунатулло Исроилов айни замон дар Академияи тенниси ба номи Ҷонс Гарсияи иёлати Флоридаи Амрико тамрин намуда, барои иштирок дар Ҷоми Девис, ки соли 2019 баргузор мегардад, омодагӣ мебинад.