Варзишгарони навраси тоҷик дар Ҷоми Осиё оид ба дзюдо соҳиби ду медал шуданд

ДУШАНБЕ, 23.07.2018 /АМИТ «Ховар»/. Паҳлавонони тоҷик дар Ҷоми Осиё оид ба дзюдо миёни наврасон, ки 21 июл дар шаҳри Макаои Ҷумҳурии Мардумии Чин доир шуд, сазовори 2 медал гардиданд.

Тавре аз Федератсияи дзюдои Тоҷикистон ба хабарнигори АМИТ «Ховар» иттилоъ доданд, аз Ҷумҳурии Тоҷикистон дар ин мусобиқа 4 варзишгар — Сулаймони Ҷамшед дар вазни -60 кг, Ғаниҷон Ғаниев дар вазни -73 кг, Фаридун Холиқов дар вазни -81 кг ва Эмомризо Қурбонов дар вазни -90 кг иштирок карданд
Сулаймони Ҷамшед дар ин мусобиқаи варзишӣ ҳамаи ҳарифонашро мағлуб карда, сазовори медали тилло гардид. Ӯ дар финал бар  варзишгари  Ҳиндустон Майанк Кадиан ғолиб омад. Паҳлавони дигари  тоҷик  Ғаниҷон Ғаниев дар вазни худ ҷойи сеюмро ишғол намуда, соҳиби медали биринҷӣ гардид.

Эмомризо Қурбонов дар мусобиқа ҷои панҷумро ишғол кард.

Ёдовар  мешавем, ки  дар Ҷоми Осиё оид ба дзюдо миёни наврасон дар Макао 125 варзишгар (80 писар, 45 духтар) аз 29 давлати ҷаҳон иштирок карданд.