Дар Душанбе ҷаласаи Х Шӯрои марказии Ҷамъияти ихтиёрии мусоидат ба артиш, авиатсия ва флоти ИДМ баргузор мегардад

ДУШАНБЕ, 09.08.2018. /АМИТ «Ховар»/. 15 августи соли равон дар асоси  ризоияти Асосгузори сулҳу ваҳдати миллӣ  — Пешвои миллат, Президенти Ҷумҳурии Тоҷикистон муҳтарам Эмомалӣ  Раҳмон  дар толори «Кохи афсарон» — и Вазорати мудофиаи Ҷумҳурии Тоҷикистон ҷаласаи Х Шӯрои марказии  Ҷамъияти ихтиёрии мусоидат ба артиш, авиатсия ва флоти Иттиҳоди Давлатҳои Мустақил баргузор мегардад. Дар он ҳайатҳои расмии Федератсияи Россия, ҷумҳуриҳои Тоҷикистон, Беларус, Арманистон, Қазоқистон ва Қирғизистон иштирок менамоянд. Дар ин бора ба АМИТ «Ховар» аз Хадамоти  матбуоти Кумитаи марказии Ташкилоти ҷамъиятии мададгори мудофиаи Ҷумҳурии Тоҷикистон хабар доданд.

Ба иттилои манбаъ, дар ҷаласаи мазкур раиси Кумитаи марказии Ташкилоти ҷамъиятии мададгори мудофиаи Ҷумҳурии Тоҷикистон дар мавзӯи дастовардҳои ташкилоти мазкур дар самти таҳкими иқтидори мудофиавии Тоҷикистон тавассути тадбиқи ҳадафҳои оинномавӣ  маърӯза менамояд.

Бо назардошти эълон гардидани соли 2018 ҳамчун Соли   рушди сайёҳӣ  ва ҳунарҳои мардумӣ  ҳайатҳои расмии иштироккунанда аз Кохи Наврӯз ва Осорхонаи миллӣ дидан намуда, бо осори ҳунарӣ, меъморӣ  ва таърихии миллати соҳибтамаддуни тоҷик  ошно мегарданд.

Қобили зикр аст, ки айни ҳол дар ҳайати Шӯрои марказии  Ҷамъияти ихтиёрии мусоидат ба артиш, авиатсия ва флоти Иттиҳоди Давлатҳои Мустақил   2700 кумитаҳои шаҳрию ноҳиявӣ, наздики 900 муассисаи таълимӣ, зиёда аз 5 миллион аъзо муттаҳид шудаанд. Дар сохторҳои Шӯрои марказии  Ҷамъияти ихтиёрии мусоидат ба артиш, авиатсия ва флоти Иттиҳоди Давлатҳои Мустақил  ҳамасола зиёда аз 200 ҳазор мутахассис барои Қувваҳои Мусаллаҳ ва беш аз 1 миллион 100 ҳазор нафар  мутахассисони касбҳои оммавӣ  – техникӣ  омода карда мешаванд. Зиёда аз  2 миллион нафар бошанд, бо варзишҳои авиатсионӣ, техникӣ  ва ҳарбӣ  – амалӣ  машғуланд.

Шӯрои мазкур  ба кишварҳои аъзо ҷиҳати ҳалли масъалаҳои тарбияи ҳарбӣ  – ватандӯстӣ, тайёр намудани  шаҳрвандон  аз рӯи тахассусҳои ҳарбӣ   барои хизмати низомӣ   дар сохторҳои миллии қудратӣ,  таълим додани касбҳои оммавӣ  – техникӣ, ҷалби ҷавонон ба эҷоди техникӣ  ва машғулиятҳои варзишии авиатсионӣ, техникӣ  ва ҳарбӣ  – амалӣ  кумак мерасонад.