«ЭЙ НАҲЗАТ, АЗ АМАЛҲОИ ТЕРРОРИСТИАТ ДАСТ КАШ!»,- муроҷиати Анҷумани тоҷикони Туркия

ДУШАНБЕ, 01.08.2018 /АМИТ «Ховар»/. Анҷумани тоҷикон дар Туркия бо хондани шарҳи расмии Прокуратураи генералии Ҷумҳурии Тоҷикистон оид ба куштори сайёҳони хориҷӣ дар роҳи автомобилгарди Кӯлоб-Душанбе мулоҳизаҳои худро нисбат ба фаъолияти ташкилоти террористӣ-эктремистии ҳизби наҳзати исломӣ чунин изҳор кард:

Шахс ва гурӯҳе, ки як маротиб одам куштааст, ҳатман бори дигар ҷинояташро такрор менамояд. Зеро қотил танҳо баъди куштани шахси бегуноҳ ором мегардад. Чунон ки ба ҳама маълум аст, аъзои наҳзат дар куштори миллати тоҷик борҳо даст задааст, аммо ин маротиб усули кушторро тағйир дода, даст ба қатли бераҳмонаи хориҷиён заданд.

Бояд тамоми кишварҳои дунё бо хабар бошанд, ки наҳзат шикорро нисбат ба шаҳрвандони хориҷӣ оғоз намудааст. Ҳол он ки тақрибан ҳамаи аъзои наҳзат дар кишварҳои аврупоӣ бар сар мебаранд. Ба истилои дигар созмони хонаводагӣ курнамак ҳастанд, солҳо нони миллати тоҷикро хурданд ва мардуми бегуноҳи тоҷикро қатл карданд. Имрӯз бошад, дар кишварҳои аврупоӣ ба сар мебаранд ва сайёҳони онҳоро мекушанд.

Аммо бояд ба инобат гирифт, ки роҳбарияти наҳзат иҷрокунандаи супориши кишвари ба мо «дӯст»-и Эрон мебошад.

М. Кабирӣ дастпарвари Ҷумҳурии Исломии Эрон буда, бояд садоқати худро ба Ҳумайнӣ ва хадамоти махсуси он кишвар нишон диҳад. Илоҷи дигар низ вуҷуд надорад, танҳо «садоқати самимӣ» яъне ба ҳалок расонидани ашхоси бегуноҳ метавонад, ӯро таскин бахшад.

Мо шаҳрвандони тоҷики муқими Туркия амали ноҷавонмардонаи наҳзатро маҳкум намуда, аз аъзои созмони террористӣ талаб менамоем, ки аз амалҳои террористиашон даст кашанд».

Анҷумани тоҷикон дар Туркия