«САЙЁРА РАНГ ИВАЗ МЕКУНАД». Филми нави «Суғдсинамо» ба намоиш гузошта мешавад

ДУШАНБЕ, 31.08.2018. /АМИТ «Ховар»/. Ба муносибати 27 – солагии Истиқлолияти давлатии Ҷумҳурии Тоҷикистон рӯзҳои 22 — 25 сентябр Муассисаи давлатии «Суғдсинамо» ба номи Комил Ёрматов филми нави ҳунарии «Сайёра ранг иваз мекунад»-ро ба намоиш мегузорад.

Тавре аз киностудияи «Суғдсинамо» ба АМИТ «Ховар» иттилоъ доданд, филми нав дар жанрҳои мелодрамма ва триллер сабт шуда, дар он ҳунармандони маъруфи синамо Қурбон Собир, Таҳмина Раҷабова, Дилбар Сулаймонова, Тағоймурод Розиқов, Нурулло Ҳақназаров, Хуршед Мустафоев, Умар Алиев ва дигарон нақш бозидаанд.

«Сайёра ранг иваз мекунад», ки муҳтавои он ба таълиму тарбияи фарзанд бахшида шуда, бо дастгирии молиявии Мақомоти иҷроияи ҳокимияти давлатии вилояти Суғд асосан дар шаҳри Хуҷанд ва қисман дар деҳаи Угуки ноҳияи Деваштич ба навор гирифта шудааст.