Гулгашти кӯчаи Ф.Муҳаммадиеви ноҳияи Синои шаҳри Душанбе ба «Боғи фарҳангу фароғатии Восеъ» табдил дода мешавад

ДУШАНБЕ, 04.09.2018 / АМИТ «Ховар»/. Бо мақсади ободонӣ ва боз ҳам зебову ҷолиб гардонидани симои пойтахти Ҷумҳурии Тоҷикистон ва татбиқи Нақшаи генералии шаҳри Душанбе  аз 28 апрели соли 2017  гулгашти кӯчаи Ф.Муҳаммадиеви ноҳияи Сино ба «Боғи фарҳангу фароғатии Восеъ» табдил дода мешавад. Дар ин бора қарори Раиси шаҳри Душанбе Рустами Эмомалӣ ба имзо расид.

Тавре аз Раёсати иттилоот ва робитаҳои хориҷии дастгоҳи Раиси шаҳри Душанбе ба АМИТ «Ховар» хабар доданд, тибқи қарори мазкур  гулгашти кӯчаи Ф.Муҳаммадиеви ноҳияи Сино дар қитъаи замини масоҳаташ 4  гектар «Боғи фарҳангу фароғатии Восеъ» номгузорӣ шуда, он  ба тавозуни  мақомоти иҷроияи ҳокимияти давлатии ноҳияи Синои шаҳри Душанбе гузаронида  мешавад.

Ҳамчунин тибқи қарори зикршуда, роҳбарони сохторҳои  дахлдор  вазифадор гардидаанд, ки ҷиҳати фаъолияти минбаъдаи боғи мазкур тадбирҳои зарурӣ андешанд.