Рӯзҳои истироҳат дар Душанбе Фестивали анвои хӯрокворӣ ва пуфакҳои ҳавоӣ баргузор мегардад

ДУШАНБЕ, 21.09.2018 /АМИТ «Ховар»/. 22-23 сентябри соли равон  дар Маҷмааи давлатии «Нарӯзгоҳ»-и шаҳри Душанбе Фестивали хӯрокворӣ ва пуфакҳои ҳавоӣ таҳти унвони «Осмони рангоранги Пур-Нур» баргузор мегардад. Дар ин бора ба АМИТ «Ховар» аз Кумитаи рушди сайёҳӣ хабар доданд.

Бино ба иттилои манбаъ, фестивали мазкур бахшида ба Соли рушди сайёҳӣ ва ҳунарҳои мардумӣ таҳти сарпарастии президенти Федератсияи футболи Тоҷикистон Рустами Эмомалӣ сурат гирифта, дар он таомҳои миллӣ аз гӯшт, моҳӣ, намудҳои гуногуни питзо, нӯшокиҳо ва шириниҳо, ки хоси мардумони гуногуни сайёраанд, ба сокинону меҳмонон пешкаш мегарданд.

Намояндагони тарабхонаҳову қаҳвахонаҳо, инчунин сафоратҳои Россия, Британияи Кабир ва ИМА таомҳои гуногун пешкаш хоҳанд кард. «Таомҳои миллии ӯзбекӣ, ҳиндӣ, амрикоӣ, англисӣ, русӣ, итолиявӣ, японӣ ва ғайраҳо дар ин фестивал пешкаш карда мешаванд», — зикр намуд манбаъ.

Барои кӯдакон барномаҳои махсуси дилхушӣ ва озмунҳо доир карда мешаванд.

Дар доираи фестивал мастер-классҳо ва тренингҳо низ баргузор мегарданд.

Сипас беҳтарин ҳавонавардҳои кишварҳои Иттиҳоди Давлатҳои Мустақил пуфакҳои ҳавоиро ба осмон мебароранд.

Дар фарҷоми фестивал бо иштироки сарояндагони маъруфи тоҷик консерт доир мегардад.