Қаиқронони шинохтаи тоҷик дар Самарқанд соҳиби ду медали дигар гардиданд

 ДУШАНБЕ, 24.10.2018 /АМИТ «Ховар»/. Варзишгарони   шинохтаи тоҷик Абдусаттор Ғаффоров ва Саидилҳомхон Назиров дар рӯзи дуюми мусобиқаҳо оид ба қаиқронӣ, ки дар шаҳри Самарқанди Ӯзбекистон ҷараён доранд, ду медали биринҷӣ ба даст оварданд.

Тавре аз Федератсияи қаиқронии Тоҷикистон ба мухбири АМИТ «Ховар» Меҳрони  Қурбон иттилоъ доданд, ин навбат Абдусаттор Ғаффоров сазовори ду медал гардид.

Абдусаттор дар мусобиқаи Ҷоми Осиё дар байдаркаи якнафарӣ ба масофаи 1000 метр медали биринҷиро соҳиб шуд. Дар ин қувваозмоӣ ҷои аввалро Алексей Мочалов аз Ӯзбекистон, ҷои дуюмро Ибрагим Шарафутдинов аз Қазоқистон ишғол намуданд.

Абдусаттор ҳамчунин дар байдаркаи дунафарӣ ҳамроҳ бо Саидилҳомхон Назиров дар масофаи 1000 метр сазовори медали биринҷӣ гардид. Ҷуфти варзишгарони Қазоқистон – Давлат Султонбеков/Александ Эмелянов медали тилло, ҷуфти варзишгарони Ӯзбекистон – Александр Тропин/Вилям Ибрагимов медали нуқра гирифтанд.

Тавре қаблан иттилоъ дода будем, варзишгари маъруфи тоҷик Шаҳриёр Даминов дар Чемпионати Осиё миёни ҷавонони то 23-сола дар каноэи якнафара ба масофаи 1000 метр сазовори медали тилло шуд. Шаҳриёр ҳамчунин дар каноэи чорнафара ба масофаи 1000 метр ҳамроҳ бо Мустафо Даминов, Иван Ковалев ва Дилшод Ҷӯраев медали биринҷӣ ба даст овард.

Ёдовар мешавем, ки Чемпионати Осиё миёни ҷавонони то 23-сола ва Ҷоми Осиё оид ба қаиқронӣ дар шаҳри Самарқанди Ҷумҳурии Ӯзбекистон бо иштироки варзишгарони 15 давлати Осиё 20 октябр оғоз гардида, фардо, 25 октябр анҷом меёбад.