Дар Душанбе Конференсияи миллӣ таҳти унвони «Раванди реинтегратсияи муҳоҷирони меҳнатӣ ва нақши диаспораҳо ҳамчун шарикони рушд» баргузор мегардад

ДУШАНБЕ, 15.10.2018 /АМИТ «Ховар»/. Пагоҳ, 16 октябр дар Муассисаи давлатии «Душанбе-Плаза» Конференсияи миллӣ таҳти унвони  «Раванди реинтегратсияи муҳоҷирони меҳнатӣ ва нақши диаспораҳо ҳамчун шарикони рушд» баргузор мегардад. Дар конференсия намояндагони Дастгоҳи иҷроияи Президенти Ҷумҳурии Тоҷикистон, вазоратҳои меҳнат, муҳоҷират ва шуғли аҳолӣ, корҳои хориҷӣ, тандурустӣ ва ҳифзи иҷтимоӣ,  молия,  мақомоти иҷроияи ҳокимияти давлатии шаҳру ноҳияҳои ҷумҳурӣ, дигар сохторҳои марбута ва  намояндагони ҷамъиятҳои тоҷикон  аз  Федератсияи Россия  ва ҷумҳуриҳои Қазоқистону Қирғизистон иштирок менамоянд.

Тавре масъулини Хадамоти муҳоҷирати Вазорати меҳнат, муҳоҷират ва шуғли аҳолии Ҷумҳурии Тоҷикистон ба АМИТ «Ховар» хабар доданд, алҳол дар  ҳудуди Федератсияи Россия 48 ташкилоти ҷамъиятӣ, марказҳои фарҳангӣ ва ҷамъиятҳои тоҷикон,  дар Қазоқистон  8    ва  дар Қирғизистон  1 ташкилоти ҷамъиятӣ   фаъолият дошта,  онҳо  дар  ҳифзи ҳуқуқи муҳоҷирони меҳнатӣ-шаҳрвандони Ҷумҳурии Тоҷикистон саҳми босазо мегузоранд.