Дастаҳои «Истиқлол» ва «Душанбе-83» имрӯз сабзаи нави сунъии Варзишгоҳи марказии Душанберо имтиҳон мекунанд

ДУШАНБЕ, 17.10.2018 /АМИТ «Ховар»/.  Имрӯз дар Варзишгоҳи марказии ҷумҳуриявии Душанбе, ки Федератсияи футболи мамлакат аз рӯи Лоиҳаи махсуси Конфедератсияи футболи Осиё сабзаи сунъиашро иваз намудааст, дар доираи бозиҳои аввали ½-ниҳоии Ҷоми Тоҷикистон дастаҳои футболи «Истиқлол» ва «Душанбе-83», соати 15:00 вориди майдон шуда, ба қавле сабзаи сунъиро имтиҳон хоҳанд кард.

Ба иттилои сомонаи расмии ФФТ, сабзаи сунъии пешинаи Варзишгоҳи марказӣ ҳанӯз соли 2014 мавриди истифода қарор гирифта буд ва муддати чор сол барои дастаҳои мунтахаби Тоҷикистон ва клубҳои он хизмат кард.

Ҳамчунин хабар дода мешавад, ки аз рӯи Лоиҳаи УЭФА (Иттиҳоди футболи Аврупо) ҳама дастгоҳҳои равшанидаҳандаи Варзишгоҳи марказӣ низ иваз карда шудаанд ва он ба меъёр ва талаботи баланди байналмилалӣ ҷавобгӯ мебошад.

Имрӯз ҳамчунин вохӯрии ½-ниҳоии Ҷоми Тоҷикистон бо ширкати дастаҳои «Регар-ТадАЗ» ва «Хуҷанд» дар варзишгоҳи «Талко – Арена»-и Шаҳри Турсунзода баргузор мегардад.

Ёдовар мешавем, ки дар бозиҳои нимниҳоии Ҷоми Тоҷикистон ягона намояндаи Лигаи якуми Чемпионати Тоҷикистон- «Душанбе-83» то ҳанӯз муборизаро идома медиҳад.