Имрӯз дастаи мунтахаби наврасони Тоҷикистон бо дастаи Кореяи Ҷанубӣ бозӣ мекунад

ДУШАНБЕ, 04.10.2018 /АМИТ «Ховар»/. Имрӯз дар Чемпионати Осиё оид ба футбол миёни наврасони то 16-сола дар Малайзия дастаи мунтахаби Тоҷикистон дар вохӯрии нимниҳоӣ бо дастаи мунтахаби Кореяи Ҷанубӣ вориди сабқат мешавад. Ин вохӯрӣ дар варзишгоҳи “Петалинг-Ҷая”, соати 17:45 бо вақти Душанбе оғоз меёбад. Тавре дирӯз муайян гардид, футболбозони тоҷик дар ин вохӯрӣ бо пироҳанҳои рангаш сурх ба майдон меоянд.

Дастаи мунтахаби Тоҷикистон ба ҳайси мизбони ин дидор дар интихоби ранги либос бартарӣ дошт ва ранги сурхро интихоб кардан чунин маънидод мешавад, ки дар вохӯриҳои пешина бо дастаи мунтахаби Таиланд (2:1) ва Кореяи Шимолӣ (1:1, 4:2-аз зарбаҳои пеналтии баъдибозӣ) маҳз бо  ҳамин ранг ба ғалаба комёб гардидааст.

Кореяи Ҷанубӣ дар бозии ½ -ниҳоӣ бо пироҳанҳои рангашон сафед вориди сабқат мешавад.

Ёдовар мешавем, ки дастаи наврасони Тоҷикистон дар баробари дастаҳои мунтахаби Япония, Австралия ва Кореяи Ҷанубӣ барои иштирок дар бозиҳои финалии Чемпионати ҷаҳон -2019, ки дар Перу баргузор мегарданд, роҳхат ба даст овард.

Дар бозии дуюми нимниҳоӣ дастаҳои мунтахаби Япония ва Австралия бо ҳам қувва меозмоянд. Мо ба футболбозони навраси мамлакат дар ин бозии пурмасъулият барору комёбӣ хоҳонем.