Дар Душанбе баъди навсозӣ кӯпрукҳои роҳи оҳан ва мошингард мавриди баҳрабардорӣ қарор гирифтанд

ДУШАНБЕ, 29.11.2018 /АМИТ «Ховар»/. Имрӯз  бо иштироки Раиси шаҳри Душанбе Рустами Эмомалӣ баъди  навсозӣ кӯпрукҳои  роҳи оҳан ва мошингард, ки дар буриши кӯчаҳои Муродулло Шерализода ва Асадулло Ғуломов бо хиёбони Абӯалӣ ибни Синои   ноҳияи Синои пойтахт  ҷойгир мебошанд, мавриди баҳрабардорӣ қарор дода шуданд.

Тавре аз Раёсати иттилоот ва робитаҳои хориҷии дастгоҳи Раиси шаҳри Душанбе ба АМИТ «Ховар»  хабар доданд, корҳои сохтмонии иншооти мазкур дар асоси дастуру ҳидоятҳои Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва иқдомҳои созандаи Раиси шаҳри Душанбе Рустами Эмомалӣ  5 июли соли 2018 оғоз гардида, он дар муддати кӯтоҳ мавриди истифода қарор гирифт.

Фармоишгари лоиҳаи иншоот Мақомоти иҷроияи ҳокимияти давлатии шаҳри Душанбе буда, он аз ҷониби Корхонаи воҳиди давлатии «Пажӯҳишгоҳи лоиҳакашии иншооти нақлиётӣ» ва Ҷамъияти дорои масъулияти маҳдуди «Тоҷиклоиҳа-Инвест» тарҳрезӣ гардидааст.

Корҳои сохтмонӣ ва васлу насби иншоотро Ҷамъияти саҳомии пӯшидаи «Заводи асфалту бетон» ва Корхонаи воҳиди давалатии «Роҳи оҳани Тоҷикистон» анҷом додаанд.

Иншооти мазкур аз пули роҳи оҳан ва роҳҳои мошингард иборат буда, зимни анҷоми корҳо масоҳати беш аз 1,5 км роҳҳо бунёд ва   навсозӣ гардиданд.

Баландии такядеворҳои пул 5 метр буда, тамоми деворҳо бо сангҳои хоро  ва роҳравҳо бо тахтасангҳо оро дода шудаанд.

Дар баробари таъмиру тармими хати роҳи оҳан ва роҳҳои моишнгард дар ду тарафи он панҷараҳои мунаққаши оҳанӣ насб гардида, аломатҳои ороишии онро таҷҳизоти равшанидиҳанда зиннат медиҳанд.

Зимни шиносоӣ бо ҷараёни навсозии иншоот Раиси шаҳри Душанбе Рустами Эмомалӣ ба тарҳу услуби ороиши пул ва атрофи он мароқ зоҳир намуда, ҷиҳати бунёди композитсияҳои муосири гулу буттаҳои ороишӣ, нигоҳубини дурусти ниҳолу дарахтони атроф ва рангубор намудани намои берунаи биноҳои истиқоматӣ, инчунин тақвияти корҳои созандагиву бунёдкорӣ ба масъулини Мақомоти иҷроияи ҳокимияти давлатии шаҳри Душанбе ва ноҳияи Сино дастуру супоришҳои мушаххас дод.

Ба Раиси шаҳр иттилоъ дода шуд, ки навсозии гузаргоҳ ва пулҳои роҳи оҳан ва моишнгард мутобиқ ба меъёрҳои мусоири шаҳрсозӣ сурат гирифта, дар баробари васлу насби низоми равшанидиҳанда ва иваз намудани хатҳои оби нӯшокию интиқоли неруи барқ, инчунин атрофи он дар масоҳати беш аз 5 ҳазор метри мураббаъ ба сабзазор табдил дода шудааст.

Корҳои сохтмонӣ дар қисмати поёнии пул низ бо истифода аз масолеҳи хушсифати ороишии муосир бо сифати баланд иҷро гардида, бо мақсади таъмини ҳаракати мунтазами нақлиёт дар чаҳор қитъаи иншоот аломатҳои зарурии ҳаракат дар роҳ насб карда шудаанд.

Раиси шаҳри Душанбе Рустами Эмомалӣ ба корҳои иҷрогардида баҳои баланд дода, ба масъулини дахлдори шаҳр дастур дод, ки ҳамаи иншооти шаҳри Душанбе бояд мутобиқ ба меъёрҳои шаҳрсозии муосир ва бо инобати фароҳам овардани шароити мусоиди  зиндагии сокинон ва меҳмонони шаҳр амалӣ карда шаванд.