Хонандагони деҳаи Оқмамади ноҳияи Шуғнон баъди таътили тирамоҳӣ таҳсилро дар бинои нав идома медиҳанд

ХОРУҒ, 09.11.2018 /АМИТ «Ховар»/. Хонандагони муассисаи таҳсилоти асосии рақами 53 деҳаи Оқмамади ноҳияи Шуғнон бори сеюм аст, ки макони таҳсили худро иваз мекунанд.

Ба гуфтаи директори ин муассисаи таълимӣ Баргигул Давроншоева, «бинои кӯҳнаи мактаб аввали солҳои шастуми асри гузашта ба тарзи  ҳашар сохта шуда буд. Вале он ба боронгариҳои пай дар пай, ки хоси минтақаи мост, тоб наоварда, аввали солҳои 2000  дару девораш хароб ва бомаш фурӯ рафт. Дар муддати даҳ сол хонандагон дар хонаи хусусӣ таҳсил мекарданд. Соли 2016 Сафорати Амрико дар асоси шартнома бо Ҳукумати Ҷумҳурии Тоҷикистон ба сохтмони бинои нави таълимӣ шурӯъ кард. Акнун баъди ба поён расидани таътили тирамоҳӣ хонандагон таҳсили худро дар бинои нави замонавӣ ва муҷаҳҳаз бо асбобу анҷоми муосири таълимӣ оғоз хоҳанд кард».

Сарвари Ҷамъияти масъулияташ маҳдуди  «Стар групп» Носир Муҳиддинов гуфт, ки  «Сафорати Амрико барои бунёди ин таълимгоҳ зиёда аз 4 миллион сомонӣ ҷудо намуд ва бинокорон давоми ду сол сохтмони онро ба анҷом расониданд. Мо метавонистем дар муддати кӯтоҳтар бинои мазкурро бунёд кунем, аммо дар ҳақиқат зимистони ин мавзеъ хеле тӯлонӣ ва сард аст. Баъзан сардии ҳаво то ба 30 дараҷа хунукӣ мерасад. Агар  дар фасли зимистон ҳам корро идома медодем, шояд ҳавои сард ба сифати корҳо таъсири манфӣ мерасонд. Бинои таълимгоҳ аз 10 синфхона ва утоқи омӯзгорон иборат мебошад».

Ба иттилои мавсуф, ҳангоми бунёди бино ба тобоварии он ба зилзила, нигоҳ доштани гармӣ дар синфхонаҳо аҳамияти ҷиддӣ дода шуда, дар вақти бунёди девору васл кардани дару тиреза аз маводи гарминигоҳдоранда истифода карда шуд.

Бояд гуфт, ки таълимгоҳи мазкур дорои маркази мустақили гармидиҳӣ мебошад, ки ҳам ба воситаи неруи барқ ва ҳам ба воситаи маводи сӯзишворӣ кор мекунад.