Варзишгарони шинохтаи тоҷик дар Гран-прии Тошканд иштирок мекунанд

ДУШАНБЕ, 7.11.2018 /АМИТ «Ховар»/. Паҳлавонони шинохтаи  тоҷик дар Чемпионати байналмилалии Гран-прии дзюдо, ки аз 9 то 11 ноябр дар шаҳри Тошканди Ӯзбекистон баргузор мешавад, ширкат меварзанд. 

Тавре аз  Федератсияи дзюдои Тоҷикистон  ба мухбири АМИТ «Ховар» Меҳрони Қурбон хабар доданд, дар Гран-прии Тошканд иштироки 383 варзишгар (217 мард ва 166 зан) аз 48 кишвари панҷ қораи дунё дар назар аст.

Ба ҳайати дастаи мунтахаби Тоҷикистон таҳти раҳбарии сармураббӣ Муҳаммадмурод Абдураҳмонов 15 варзишгар дохил аст, ки 13 нафари онҳо- Иброҳим Абдуллоев (-60 кг), Меҳрзод Сӯфиев (-60 кг), Ёқубҷон Боқиев (-66 кг), Идибек Тоиров (-66 кг), Мирзоҷамил Рамазонов (-73 кг), Раҳматуллобек Фарҳодов (-73 кг), Акмал Муродов (-81 кг), Ҷаҳонгир Маҷидов (-81 кг), Эмомҷон Камолов (-90 кг), Саидҷалол Саидов (-100 кг), Шарифҷон Назриев (-100 кг), Шакармамад Мирмамадов (+100 кг), Темур Раҳимов (+100 кг) дар сабқати мардона ва 2 нафар- Фазилат Гулбоева (-52 кг) ва Шоҳида Қаландарова (-57 кг) дар сабқати занона ширкат меварзанд.