ҶАБҲАИ БУЗУРГИ СОЗАНДАГӢ ДАР ШАҲРУ ДЕҲОТИ ТОҶИКИСТОН. То ҷашни 30-солагии Истиқлолият дар пойтахти мамлакат зиёда аз 3500 иншооти нави таъйиноти гуногун сохта мешаванд

ДУШАНБЕ, 22.01.2018. /АМИТ «Ховар»/. Дар доираи татбиқи Нақшаи генералии шаҳри Душанбе, ки то соли 2040 марҳила ба марҳила амалӣ мегардад, дар маҳаллаи  «Ҳаёти  нав» — и ноҳияи Синои пойтахт биноҳои аз 35 – 40- ошёна боло бунёд карда мешаванд. Дар ин бора муовини сардори Сарраёсати меъморӣ ва шаҳрсозии шаҳри Душанбе Шодимурод Аловуддинов дар суҳбат бо мухбири АМИТ «Ховар» иттилоъ дод.

Ба гуфтаи номбурда, дар ин мавзеъ бунёди  даҳҳо биноҳои бисёр баландошёнаи маъмурӣ дар назар дошта шудааст.

«Аз ҷумла, дар маҳаллаи  «Ҳаёти  нав» марказҳои муосири таълимӣ, савдо ва хизматрасонӣ, намоишгоҳҳо ва боғҳои фарҳангиву фароғатии мутобиқ ба стандартҳои байналмилалии шаҳрсозӣ банёд карда мешаванд. Ин биноҳо ба симои пойтахти Тоҷикистон — шаҳри Душанбе ҳусни нав зам мекунанд», —  илова намуд Ш. Аловуддинов.

Ба иттилои ҳамсуҳбати мо, ин биноҳо дар раванди татбиқи марҳилаи аввал ва оғози марҳилаи дуюми Нақшаи генералии шаҳри Душанбе  сохта мешаванд. Татбиқи марҳилаи аввал то соли 2025 ва дуюм то соли 2040 дар назар дошта шудааст.

Зимнан, ҳоло дар шаҳри Душанбе тибқи Нақшаи генералӣ ва ба истиқболи 30-солагии Истиқлолияти давлатии Тоҷикистон корҳои ободониву созандагӣ бомаром ҷараён дошта, симои пойтахти Тоҷикистон рӯз аз рӯз дилрабо гардида истодааст.

Ёдовар мешавем, ки то  таҷлили ҷашни 30-солагии Истиқлолияти давлатии Ҷумҳурии Тоҷикистон дар пойтахти мамлакат зиёда аз 3500 иншооти таъйиноти гуногун ба истифода дода мешаванд.