Чемпионати Осиё: ҳама ҷуфтҳои бозиҳои 1/8-ниҳоӣ мушаххас гардиданд

ДУШАНБЕ, 18.01.2018. /АМИТ «Ховар»/. Дар Чемпионати 17-уми Осиё, ки  дар Амороти Муттаҳидаи Араб идома дорад, ҳамаи ҷуфтҳои бозиҳои 1/8-ниҳоӣ шоми дирӯз мушаххас гардиданд. Шарҳи шореҳи  АМИТ «Ховар» Аловиддин Бӯриев дар ин мавзӯъ.

Дар рӯзи охирини рақобатҳои гурӯҳӣ сараввал дастаҳои  мунтахаби Ӯзбекистон бо Япония ва Уммон бо Туркманистон дар гурӯҳи «F» бо ҳам қувва озмуданд. Футболбозони ӯзбекистонӣ, ки то даври сеюм дар садри ҷавали гурӯҳи «F» қарор доштанд, дар вохӯрии марказӣ барои ҷои аввал аз дастаи мунтахаби Япония бо натиҷаи 2:1 шикаст хӯрданд ва ба ҷои дуввум гузаштанд. Дар ин вохӯрӣ сараввал Элдор Шомуродов (40) ҳисобро боз карда, футболбозони ӯзбекро ба сафи пеш баровард, аммо баъди се дақиқа (43) ҳамлагари дастаи «Нюкасл Юнайтед» ва дастаи мунтахаби Япония Ёшинорӣ Муто ҳисобро баробар кард. Тсукаса Шиотани голи пирӯзиоварро дар дақиқаи 58-ум ба нишон расонид ва Япония бо касби 9 имтиёз ба ҷои аввали ҷадвали мусобиқот баромад.

Дар бозии дуввуми ин гурӯҳ Туркманистон аз Уммон бо нишондиҳандаи 1:3 мағлуб шуд. Туркманҳо дар ҳама бозиҳои Чемпионати Осиё ба шикаст рӯ ба рӯ шуда, бе ягон имтиёз Чемпионатро тарк карданд. Аз ин гурӯҳ дастаҳои мунтахаби Япония, Ӯзбекистон  ва Уммон муборизаро барои Ҷоми милатҳои Осиё идома медиҳанд.

Дар бозиҳои гурӯҳи «Е»  дастаи мунтахаби Қатар дар як бозии фавқулода дар баробари Арабистони Саудӣ бо дурахши ситораи 22-солааш –Алмоз Алӣ бо натиҷаи 2:0 ғолиб омада, дар ин гурӯҳ соҳиби ҷои аввал гардид. Футболбозони  Арабистони Саудӣ дар ду мусобиқаи охирашон бозии ҷолиб доштанд ва ду пирӯзӣ ба даст оварданд. Онҳо  шоми дирӯз дар муқобили дастаи мунтахаби Қатар ҳарчанд ба бартарӣ соҳиб буданд, вале ба гол задан имкон наёфтанд. Ситораи ҷавони дастаи мунтахаби Қатар -Алмоз Алӣ онҳоро моту маҳбут намуда, бо ду голаш (45+1, 80) аз осмон ба замин фаровард. Ин голи ҳафтуми Алмоз Алӣ дар Чемпионати имсолаи Осиё мебошад ва дар радабандии  нишонзанҳо дар ҷои аввал аст. Дар ин вохӯрӣ капитани дастаи мунтахаби Қатар Ҳасан Ҳайдос ҷазои пеналтиро ба самар нарасонид.

Дар бозии дуввуми ин гурӯҳ дастаи мунтахаби Лубнон бар Кореяи Шимолӣ бо бартарии 4:1 ғалаба ба даст овард. Аммо ин пирӯзӣ ба футболбозони Лубнон имкон надод, ки ба бозиҳои 1/8-ниҳоӣ роҳхат гирад. Ҳилол Бассом ду гол ва Ҳасан Алмаътуқ бо Феликс Мишел якголӣ заданд.

Ба ҳамин тартиб дар бозиҳои 1/8-ниҳоӣ ин дастаҳо бо ҳам қувва месанҷанд:

20 январ

Урдун –Ветнам

Таиланд – Чин

Эрон — Уммон

21 январ

Япония – Арабистони Саудӣ

Австралия – Ӯзбекистон

АМА – Қирғизистон

22 январ

Кореяи Ҷанубӣ – Баҳрайн

Қатар – Ироқ