Чемпионати Осиё: дастаҳои мунтахаби 9 кишвар пеш аз муҳлат ба бозиҳои плей-офф роҳхат гирифтанд

ДУШАНБЕ, 14.01.2018. /АМИТ «Ховар»/. Шоми дирӯз даври дуввуми бозиҳои финалии Чемпионати Осиё дар гурӯҳҳо ба поён расид. Дастаҳои  мунтахаби 9 кишвар- Урдун, Чин, Кореяи Ҷанубӣ, Эрон, Ироқ,  Қатар, Арабистони Саудӣ, Ӯзбекистон ва Япония пеш аз муҳлат ба бозиҳои даври 1/8-ниҳоӣ роҳхат гирифтанд. Шарҳи Аловиддин Буриев дар бораи натиҷаҳои охири Чемпионати 17-уми Осиё оид ба футбол.

Дар вохӯрӣ бо дастаи мунтахаби Қирғизистон дар гурӯҳи «С» футболбозони Кореяи Ҷанубӣ дар варзишгоҳи «Ҳазза бин Зайд Стедиум»-и шаҳри Алайн бо натиҷаи 1:0 ғолиб омаданд.   Ким Мин-ҷае  баъди зарбаи кунҷӣ дар иҷрои Ҳонг Чул тӯбро дар дақиқаи 41-ум вориди дарвозаи Кутман Кадирбеков кард.

Кутман Кадирбеков-дарвозабони дастаи мунтахаби Қирғизистон дар ин вохӯрӣ яке аз беҳтарин бозингароне буд, ки қирғизҳоро аз бохти калон наҷот дод. Се маротиба тӯб ба сутун ва тири дарвозаи дастаи мунтахаби Қирғизистон бархӯрд ва ҳамлагарони дастаи мунтахаби Кореяи Ҷанубӣ ҳолатҳои садфоизаи голзаниро истифода бурда натавонистанд.

Дар ин гурӯҳ дастаи мунтахаби Чин дар рақобат бо дастаи мунтахаби Филиппин бо ҳисоби 3:0  ғалаба ба даст овард. Дар вохӯрии мазкур ду тӯбро Ву Лей (40, 66) ба дарвоза зад. Йу Дебао муаллифи голи сеюми чиниҳо гардид.

Дар гурӯҳи  «Б» дастаи мунтахаби Австралия баъди бохти аввалаш аз дастаи мунтахаби  Урдун бо қаҳру ғазаб футболбозони Фаластинро   бо натиҷаи 3:0 шикаст дод.

Дар бозии даври дуюми гурӯҳи «Д» дастаи мунтахаби Эрон бо ду голи задаи Сардор Озмун (38 ва 69) дастаи мунтахаби Ветнамро мағлуб кард ва  пеш аз муҳлат озими бозиҳои 1/8-ниҳоӣ гардид.

Дар ин гурӯҳ  дастаи мунтахаби Ироқ ҳам бо натиҷаи 3:0 бартарии худро нисбат ба   Яман нишон дод. Ин даста низ вазифаи ба даври дигар гузаштанро иҷро намуд

Яке аз ғалабаҳои аз ҳама калони Чемпионати Осиё дар вохӯрии байни дастаҳои мунтахаби Қатар ва Кореяи Шимолӣ ба қайд гирифта шуд. Мизбонони бозиҳои финалии Чемпионати ҷаҳони соли 2022- қатариҳо бо ҳисоби калони 6:0 рақиби худро шикаст доданд. Ҳамлагари дастаи мунтахаби Қатар Алмаз Алӣ ба дарвозаи Ри Миён-гук чор тӯб зада, покер кард ва бо шаш тӯб ба ҷои аввали нишонзанҳои беҳтарини Чемпионати Осиё  баромад.

Дар ин гурӯҳ Арабистони Саудӣ низ бар Лубнон бо нишондоди 2:0 ғалаба кард.

Вохӯрии байни дастаҳои мунтахаби ҳамсоякишварҳои мо -Ӯзбекистон ва Туркманистон дар гурӯҳи  «Ф» бо пирӯзии футболбозони ӯзбек бо ҳисоби калони  4:0 анҷом ёфт. Ду голро Элдор Шомуродов ба нишон расонд.

Дар ин гурӯҳ дастаи мунтахаби Япония бар Уммон бо ҳисоби 1:0  бартарӣ дорад.

Имрӯз бозиҳои даври сеюм бо ширкати дастаҳои мунтахаби гурӯҳи «А» оғоз меёбанд.