Минбаъд кормандони объектҳои савдо ва хизматрасонии шаҳри Душанбе бо либоси ягона фаъолият мекунанд

ДУШАНБЕ, 26.01.2018. /АМИТ «Ховар»/. Минбаъд кормандони объектҳои савдо ва хизматрасонии ҳудуди шаҳри Душанбе бо либоси ягонаи махсуси корӣ фаъолияти хешро ба роҳ мемонанд. Дар ин бора дирӯз, 25 январ қарори дахлдори Раиси шаҳри Душанбе Рустами Эмомалӣ ба имзо расид.

Тавре аз Раёсати  иттилоот ва робитаҳои хориҷии дастгоҳи Раиси шаҳри Душанбе ба мухбири АМИТ «Ховар» хабар доданд,  иқдоми мазкур бо мақсади андешидани тадбирҳои амалӣ дар самти  баланд бардоштани сатҳи хизматрасонӣ, қонеъ гардонидани талаботи истеъмолкунандагон ба иҷрои корҳо ва хизматрасонии маишӣ   дар ҳудуди шаҳри Душанбе роҳандозӣ мегардад.

Рустами Эмомалӣ масъулинро вазифадор намудааст  новобаста аз шакли моликият ва тобеъияти идоравӣ  ҷиҳати ҷорӣ намудани  либоси ягонаи махсуси корӣ ва риояи он дар муддати  1 моҳ тадбирҳо андешанд.

Ба иттилоъи манбаъ, қарори мазкур барои тасдиқ ба Маҷлиси вакилони халқи шаҳри Душанбе пешниҳод карда шуд.