ОФАРИН! Дастаи мунтахаби олимпии Тоҷикистон мусобиқаи «Чор миллат»-ро бо ғалаба оғоз кард

ДУШАНБЕ, 16.01.2019 /АМИТ «Ховар»/. Шоми  дирӯз  дастаи мунтахаби то  23-солаи олимпии Тоҷикистон   дар аввалин бозиаш дар Мусобиқаи байналмилалии «Чор миллат», ки  дар шаҳри Доҳаи  Қатар доир гардид, бар дастаи мунтахаби Эрон  бо ҳисоби   2:1  ғолиб омад.  Дар ин бора корманди  Кумитаи миллии олимпии Тоҷикистон Умаралӣ САФАРАЛӢ  ба мухбири АМИТ «Ховар» Меҳрони ҚУРБОН хабар дод.

Зикр шуд, ки ин бозии хеле ҷолиб  дар майдони футболи Академияи «Aspire» баргузор шуд. Ҳисобро дар дақиқаи 4-ум ҳамлагари  дастаи  мунтахаби  Эрон Воҳид Номдорӣ кушод. Дар охири нимаи аввали бозӣ капитани  дастаи футболи мунтахаби  Тоҷикистон Эҳсони Панҷшанбе, ки беҳтарин бозингари соли 2018 дониста шуда буд, хатои ҳимоятгари дастаи Эронро пай бурда, ҳисобро баробар кард. Дар оғози нимаи дуюм, дақиқаи 50-ум, ҳамлагари дастаи  футболи «Истиқлол»-и Душанбе Шериддин Бобоев бо дарвозабони дастаи ҳариф як ба як баромада, тӯбро тавассути кунҷи дарвоза вориди он  намуд. Дар дақиқаҳои боқимонда бозингарони эронӣ барои наҷот додани дастаашон кӯшиш намуданд, вале футболбозони мо хати ҳимояро пурзӯр карда, ғалабаи  Тоҷикистонро бо ҳисоби  2:1 таъмин карданд.

Дар бозии дигари даври аввали мусобиқа дастаи  мунтахаби олимпии Қатар бар  дастаи  мунтахаби  Кувайт бо ҳисоби 3:1 ғалаба кард.

Ёдовар  мешавем, ки бозиҳои даври дуюми мусобиқаи «Чор миллат» дар шаҳри Доҳаи Қатар 18 январ доир мегарданд. Ин бор  дастаи мунтахаби олимпии Тоҷикистон муқобили дастаи мизбон – Қатар вориди майдон мешавад. Оғози бозӣ – соати 21:30 бо вақти Душанбе мебошад.

Сармураббии  дастаи  мунтахаби олимпии Тоҷикистон   Усмон Тошев баъд аз бозӣ андешаҳояшро чунин баён кард:

«Оғози мусобиқа бо ғалаба аз нигоҳи психологӣ бисёр хуб аст. Бачаҳо эҳсос карданд, ки метавонанд бозӣ кунанд ва ғолиб оянд. Вале хато бисёр аст. Ба ҳар сурат ҳаяҷонро дар бозии аввал як тараф гузошта, бозӣ кардан ва се хол ба даст овардан зарур буд. Бачаҳо кӯшиш карданд, ман аз бозиашон дар майдон ва худфидоияшон розиам. Бозӣ бисёр ҷолиб буд. Бачаҳо тавонистанд худро нишон диҳанд ва ду гол заданд. Ин аз ҷиҳати психологӣ муҳим аст, аз ин рӯ оянда кор мекунем. Бозии мо аз бозии идеалӣ бисёр дур аст, бинобар ин тамрин ва рушд кардан щарур аст. Аз ҳама муҳим — бо тамоми қувва ба марҳилаи интихобии Чемпионати Осиё-2020, ки 22-26 март дар  шаҳри Тошканди  Ҷумҳурии Ӯзбекистон баргузор мешавад, омодагӣ дидан зарур аст».