Рустами Эмомалӣ дар шаҳри Хоруғ 8 майдончаи замонавӣ бунёд мекунад

ДУШАНБЕ, 16.01.2019. /АМИТ «Ховар»/. Президенти Федератсияи футболи Тоҷикистон Рустами Эмомалӣ дар ин сол дар маркази маъмурии Вилояти Мухтори Кӯҳистони Бадахшон (ВМКБ) – шаҳри Хоруғ 8 майдончаи замонавӣ бунёд мекунад. Дар ин бора и.в. Раиси ВМКБ Ёдгор Файзов дар мулоқот бо варзишгарони вилоят изҳор дошт.

Тавре қаблан хабарнигори АМИТ «Ховар» хабар дод, роҳбари вилоят дирӯз 95 нафар варзишгарон ва мураббиёни вилоятро, ки соли гузашта ба муваффақиятҳо ноил гардидаанд, бо мукофоти пулӣ, шаҳодатномаҳо ва туҳфаҳои арзишманд қадрдонӣ намуд.

Ё. Файзов иштироки варзишгарон–зодагони вилоятро дар мусобиқаҳои байналмилалии соли 2018, ки миёни онҳо чемпиони ҷаҳон оид ба самбо Хушқадам Хусравов ва барандаи медали биринҷии Чемпионати ҷаҳон оид ба дзюдо Шакармамад Мирмамадов мебошанд, махсус зикр намуд.

Ӯ изҳори боварӣ кард, ки варзишгарон аз Бадахшони Кӯҳӣ минбаъд низ дар чемпионатҳои байналмилалӣ ва ҷаҳонӣ сазовор баромад мекунанд.

Имрӯз дар ВМКБ 10 мактаби варзишӣ ва 62 иншооти варзишӣ фаъолият доранд. Соли 2018 варзишгарони вилоят дар мусобиқаҳои ҷумҳуриявӣ ва байналмилалӣ 65 медали тилло ба даст оварданд.