Дастаи мунтахаби наврасони Тоҷикистон (U-17) имрӯз ба Туркия сафар мекунад

ДУШАНБЕ, 05.02.2018. /АМИТ «Ховар»/. Дастаи мунтахаби наврасони Тоҷикистон оид ба футбол (U-17)  шоми имрӯз барои машғулиятҳои  таълимӣ-машқии навбатии худ ба шаҳри Анталияи  Туркия сафар мекунад. Тавре сомонаи расмии ФФТ хабар медиҳад, футболбозони навраси Тоҷикистон дар Туркия омодагии худро ба бозиҳои Чемпионати ҷаҳон, ки дар Перу баргузор хоҳад шуд, идома медиҳанд.

Ҷамъомади таълимӣ-машқӣ то 19 феврал идома меёбад. Дастпарварони Зайниддин Раҳимов дар давраи машғулиятҳо се бозии таҷрибавии худро бо дастаҳои наврасони “Ференсварош” –и Венгрия (9 феврал), “Академикс  Болдклуб Гладсакс”-и Дания (13 феврал) ва боз як дастаи дигар, ки то ҳанӯз муайян нашудааст (18 феврал),  барпо мекунанд.

Ҷамъомади таълимӣ-машқӣ яке  аз марҳилаҳои  омодагӣ ба Чемпионати ҷаҳон-2019 ба ҳисоб меравад, ки аз  5 то 27  октябр дар Перу баргузор мегардад. 14 май баъди қуръакашии бозиҳо дастаҳои мунтахабе, ки бо  наврасони Тоҷикистон дар як гурӯҳ ҷойгир мешаванд, муайян хоҳанд шуд. Алҳол ҳафт даста ба бозиҳои финалӣ роҳхат гирифтаанд: Перу (мизбон), Япония, Тоҷикистон, Австралия, Кореяи Ҷанубӣ аз Осиё, Зеландияи Нав ва Ҷазираҳои Сулаймон аз Уқёнус.

Ҳайати дастаи мунтахаби Тоҷикистон (U-17):

Дарвозабонҳо: Муҳриддин Ҳасанов («Парвоз»), Комрон Иброҳимов, Самандар Каримов (аз «Локомотив-Помир»);

Муҳофизатгарон: Асадбек Зиёзода («Истаравшан»), Шаҳром Назаров, Шоҳрух Сангов, Ҷонибек Шарифов, Исроил Холов, Мехробҷон Азимов (ҳама аз «Локомотив-Помир»);

Нимҳимоятгарон: Муҳаммадалӣ Азизбоев («Истаравшан»), Иброҳим Зокиров («Регар-ТадАЗ»), Эмомалӣ Аҳмадхон, Нидоёр Забиров, Шарифбек Раҳматов, Шуҳрат Элмуродов, Озодбек Панҷиев, Азизбек Ҳасанов, Амадони Камолов, Хамзаҷон Аҳтамов (ҳама аз «Локомотив-Помир»);

Ҳамлагарон: Сунатулло Исмоилов («Хатлон»), Ислом Зоиров, Рустам Соиров, Парвиз Хоҷиев (ҳама аз «Локомотив-Помир»).

Сармураббӣ – Зайниддин Раҳимов.