«АЛЛА МЕГУМ, БАЧАМЕ…». Дар Душанбе Фестивали ҷумҳуриявии «Суруди Модар-Алла» баргузор шуд

Март 6, 2019 17:01

ДУШАНБЕ, 06.03.2019 /АМИТ «Ховар»/.  Имрӯз дар «Кохи Суруш»-и шаҳри Душанбе бо  ташаббуси Кумитаи  кор  бо ҷавонон ва  варзиши назди Ҳукумати Ҷумҳурии Тоҷикистон Фестивали ҷумҳуриявии «Суруди Модар – Алла»  баргузор  гардид.

Фестивал  ба Рӯзи Модар бахшида шуда, мақсади асосии он   баланд бардоштани мақоми зан дар ҷомеа, расидан ба қадри зан- модар ва заҳматҳои шабонарӯзии ӯ мебошад.
Бояд гуфт, ки сароидани   суруди алла дар сари гаҳвораи фарзанд мерос аз гузаштагонамон буда, то ба рӯзҳои мо расидааст ва насиби наслҳои ояндда низ хоҳад шуд.

Тавре  Раиси Кумитаи кор бо  ҷавонон ва варзиши назди Ҳукумати Ҷумҳурии Тоҷикистон Аҳтам Абдуллозода дар расмии тантанавии фестивал  иброз дошт, маҳз модар метавонад  бо суруди аллаи худ дар қалби фарзандонаш тухми меҳру муҳаббат, дӯстиву рафоқат ва некиву накӯкорӣ бикорад, то  дар оянда насли наврас чун  одамони масъулиятшиносу меҳнатқарин ба воя расанд. Аввалин навозише, ки бо лафзи ширини модар дар гӯши мо садо медиҳад, ин аллаи модар аст, ки тамоми орзуву ҳавасҳояшро барои фарзанд тариқи он иброз медорад.

«Модар офарандаи ҳаёт, тарбиятгари наслҳо, ҳидоятгари наврасону ҷавонон буда, мақоми ӯ дар тамаддуни башарият ва сарнавишти ҳар қавму миллат, бахусус тоҷикон хеле баланд аст. Беҳуда нест, ки нобиғаҳои олам дар назди зан- модар  сари таъзим фуруд оварда, таъкид кардаанд, ки модар офарандаи ҳаёт, эҳёгари зиндагӣ ва илҳомбахши рӯзгори мо мебошад. Зан-Модар инъикосгари симои зоҳирӣ ва ботинии ҳар як давлату миллат ба ҳисоб  меравад. Ҳар қадаре зан бомаърифат бошад, ҳамон қадар фарзандон ва ҷомеаву давлат ободу  устувор мегардад. Заҳматҳои беназири зан- модар  моро водор месозанд, ки қадру қимат ва эҳтироми ӯро ҳамеша ба ҷо оварем ва барои ӯ шароити мусоид муҳайё кунем, то ӯ тавонад дар баробари фаъолияти созандааш фарзандони солиму соҳибмаърифат тарбия намояд. Дар  ҳақиқат  модар фариштаи осмонӣ, сарчашмаи рӯзгор, хуршеди меҳровару дилнавоз ва устоди нахустини зиндагии мо мебошад»,- гуфт Аҳтам Абдуллозода.

Ба   андешаи равоншиносон, фарзандоне, ки  аз модаронашон суруди  алла шунидаанд,  нисбат ба  кӯдаконе, ки аз алла  бенасиб мондаанд, нарммиҷозу меҳрубонтаранд.    Аллаи  модар   тифлро ором  намуда, зеҳнашро рушд мебахшад. Ҳар қадар, ки модар  сари гаҳвораи фарзанд алларо бо  муҳаббат сарояд, ҳамон қадар фарзанди ӯ меҳрубону оромтабиат ба воя мерасад.

Тавре сокини шаҳри Душанбе Мавлуда Мирбоева зимни суҳбат ба хабарнигори АМИТ «Ховар» гуфт, алла ин  нахустин сухани модар ба фарзандаш аст. Муҳаббату дилбастагии модару фарзанд маҳз тавассути алла ба вуҷуд меояд. Бо садои алла тифл хоби роҳат меравад.

Вале номбурда аз он изҳори нигаронӣ намуд, ки дар ҷомеаи имрӯза модарони ҷавон наметавонанд ба фарзандони худ суруди алла бихонанд ва ё ин ки ба андешаи онҳо, сароидани суруди алла — ин нишонаи қафомондагӣ аст. Ҳол он ки маҳз суруди алла метавонад тифлро аз рӯзҳои нахустини таваллуд ба дӯст доштану некном ба воя расидан водор кунад.

Даври аввал ва дуюми Фестивали  «Суруди Модар – Алла»  дар шаҳру ноҳияҳо ва вилоятҳо доир гардида, беҳтаринҳо ба  сатҳи ҷумҳуриявӣ роҳ ёфтанд. Дар даври ҷумҳуриявӣ беҳтарин донандагон ва сарояндагони  алла иштирок намуда,  бо ҳунари худ чанд лаҳза ҳозиринро ба фараҳбахштарин даврони зиндагӣ — ҳаёти  тифлона ворид намуданд.

Март 6, 2019 17:01

Хабарҳои дигари ин бахш

Кэтрин Рассел, директори иҷроияи ЮНИСЕФ: «Мо мехоҳем, ки садои кӯдакон ва ҷавонон дар сиёсати иқлимӣ шунида шавад»
Ясмин Сиддиқӣ: «Обшавии пиряхҳо танҳо як мушкили муҳити зист нест, ин буҳрони об, ғизо ва рӯзгор аст»
Қоҳир Расулзода Конфронси байналмилалии сатҳи баланд оид ба ҳифзи пиряхҳоро натиҷагирӣ намуд
Шамс Аббосӣ: «Таҳти роҳбарии Эмомалӣ Раҳмон мардуми тоҷик дар самти мубориза бо тағйирёбии иқлим ва пешбурди донишҳои экологӣ қадамҳои бузург мегузоранд»
Султон Ҷамшед: «ВАО-и Тоҷикистон дар инъикоси кори конфронси сатҳи баланд муваффақ буд»
КОНФРОНСИ БАЙНАЛМИЛАЛИИ САТҲИ БАЛАНД ОИД БА ҲИФЗИ ПИРЯХҲО. Дар Душанбе масоили кунунии мониторинги пиряхҳо дар Осиёи Марказӣ баррасӣ шуд
Кристин Мишел: «Дар масъалаи тағйирёбии иқлим ва ҳифзи пиряхҳо давлатҳои ҷаҳон бояд муттаҳид бошанд»
Лидия Брито: «ЮНЕСКО Эъломияи Душанбе оид ба ҳифзи пиряхҳоро дастгирӣ намуда, ҳамеша дар паҳлуи ҷомеаи ҷаҳонӣ қарор мегирад»
КОНФРОНСИ БАЙНАЛМИЛАЛИИ САТҲИ БАЛАНД ОИД БА ҲИФЗИ ПИРЯХҲО. Дар рӯзи дуюм аз рӯйи шаш мавзуъ ҳамоишҳои канорӣ доир мегарданд
ДУШАНБЕ-МАРКАЗИ ҚАБУЛИ ҚАРОРҲОИ МУҲИМИ БАЙНАЛМИЛАЛӢ. Дар ҳошияи Конфронси байналмилалии сатҳи баланд оид ба ҳифзи пиряхҳо
Дар Душанбе хатари офатҳои табиии марбут ба пиряхҳоро баррасӣ намуданд
Дар доираи Конфронси байналмилалии сатҳи баланд оид ба ҳифзи пиряхҳо масоили об ва иқлим баррасӣ гардид