АМИТ «ХОВАР» АГЕНТИИ ИТТИЛООТИИ СОЛ ЭЪЛОН ГАРДИД. Имрӯз дар Душанбе таҷлили расмии Рӯзи матбуоти тоҷик баргузор шуд

Март 11, 2019 19:48

ДУШАНБЕ, 11.03.2019./АМИТ «Ховар»/.  Бино ба натоиҷи назарпурсие, ки Академияи воситаҳои ахбори омма ва Иттифоқи журналистони Тоҷикистон доир кардаанд, Агентии миллии иттилоотии Тоҷикистон «Ховар» агентии иттилоотии сол номида шуд. Натиҷаҳои ин назарпурсӣ  имрӯз, дар ҷаласаи тантанавӣ бахшида ба Рӯзи матбуоти тоҷик, ки дар толори Театри академии драмавии ба номи Абулқосим Лоҳутӣ  баргузор гардид,  эълон карда шуд.

Хотиррасон мешавем, ки ба ифтихори Рӯзи матбуоти тоҷик ва муайян кардани ғолибон аз рӯи номинатсияҳои  «Агентии сол»,  «Шабакаи телевизионии сол», «Шабакаи радиоии сол»,  «Рӯзномаи (ҳафтаномаи)  сол» ва «Маҷаллаи сол», «Дастрастарин маркази матбуоти  мақомту идораҳо» Академияи ВАО ва  Иттифоқи журналистони Тоҷикистон назарсанҷӣ гузаронида, дар Рӯзи матбуоти тоҷик   ғолибонро қадрдонӣ намуданд. Ҳамчунин дар ҷамъомади ба ифтихори Рӯзи матбуоти тоҷик, ки бо иштироки доираи васеи рӯзноманигорон, собиқадорони матбуоти тоҷик сурат гирифт, Ёрадамчии Президенти Ҷумҳурии Тоҷикистон оид ба масъалаҳои рушди иҷтимоӣ ва робита бо ҷомеа Абдуҷаббор Раҳмонзода,  Вазири фарҳанги Тоҷикистон Шамсиддин Орумбекзода ва Раиси Иттифоқи журналистони Тоҷикистон Зинатулло Исмоилзода иштирок ва суханронӣ намуданд.

Вазири фарҳанги Ҷумҳурии Тоҷикистон Шамсиддин Орумбекзода зимни ифтитоҳи ҷамъомад Рӯзи матбуоти тоҷикро аз қабили падидаҳои даврони соҳибистиқлолии кишвар   арзёбӣ намуда, зикр кард, ки  он  бо ибтикори Асосгузори сулҳу Ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон аз соли 1995  инҷониб дар саросари Тоҷикистон расман   ҷашн гирифта мешавад. Рӯзи матбуоти тоҷик  ба чопи нахустин рӯзномаи тоҷикӣ «Бухорои шариф», ки шумораи аввалинаш 11 марти соли 1912 интишор ёфта, дастраси хонандагон гардида буд,  иртибот дорад. Ҳамасола  ин сана чун иди касбии кормандони воситаҳои ахбори омма,   матбуот ва табъу нашр  таҷлил  карда мешавад.

Ёрдамчии Президенти Ҷумҳурии Тоҷикистон оид ба масъалаҳои рушди иҷтимоӣ ва робита бо ҷомеа Абдуҷаббор Раҳмонзода роҷеъ ба роҳи тайкардаи матбуоти тоҷик сухан гуфта, нақши рӯзноманигоронро дар тарғибу ташвиқи дастовардҳои солҳои соҳибистиқлолии кишвар ва баррасии муҳимтарин масъалаҳои ҳаёти ҷомеа муҳим ва арзанда арзёбӣ намуд. Номбурда аз рӯзноманаигорон даъват ба амал овард, ки боз ҳам дар самти фаъолияти худ масъулиятшинос ва дар баррасии  масъалаҳои доғи ҷомеа дақиқназар бошанд.

Дар идомаи ҷамъомади тантанавӣ  барандагони Ҷоизаи Иттифоқи журналистони Тоҷикистон ба номи устод Абулқосим Лоҳутӣ қадрдонӣ гардида, сипас ғолибон аз рӯйи номинатсияҳои «Агентии сол», «Шабакаи телевизионии сол», «Шабакаи радиоии сол»,  «Рӯзномаи (ҳафтаномаи) сол»,  «Маҷаллаи сол», «Дастрастарин маркази матбуоти  мақомоту идораҳо» бо дипломҳои Академияи ВАО ва Иттифоқи журналистони Тоҷикистон сарфароз гардонида шуданд.

Мавриди зикр аст, ки дар ҳамоиш АМИТ «Ховар» барои ҳамкории самаранок, саҳми бориз дар тарғиби ҳадафҳои давлат ва Ҳукумат ва арзишҳои миллӣ инчунин бо сипосномаҳои Вазорати корҳои дохилии Ҷумҳурии Тоҷикистон, Вазорати тандурустӣ ва ҳифзи иҷтимоии аҳолии Ҷумҳурии Тоҷикистон ва Ҳизби Халқии Демократии Тоҷикистон сарфароз гардонида шуд.

Хотиррасон мешвем, ки  тибқи  маълумоти тадқиқотчиёни рӯзноманигории ватанӣ, маҳз дар ҳамин рӯзи соли 1912 аввалин шумораи рӯзномаи тоҷикии «Бухорои шариф» аз чоп баромадааст.    Шурӯъ аз соли 1994 Рӯзи матбуот 11 март- дар рӯзи чопи аввалин шумораи рӯзномаи «Бухорои Шариф» таҷлил мешавад. Аввалин рӯзномаи давлатии Ҷумҳурии Мухтори Тоҷикистон соли 1925 бо номи «Иди тоҷик» таъсис ёфта буд, ки имрӯз бо номи «Ҷумҳурият» нашр мешавад. Абулқосим Лоҳутӣ аз аввалин муҳаррирони рӯзномаи «Иди тоҷик» буд, ки дар баробари эҷодиёти ниҳоят ғановатмандаш дар рушди матбуоти тоҷик низ хизматҳои шоён ба анҷом расонидааст. Дар давраҳои минбаъда низ аксари адибони маъруфи мо ва умуман аҳли қалам фаъолияти худро аз воситаҳои ахбори омма оғоз карда,  бо онҳо ҳамкории доимӣ доштанд. Онҳо бо ҳамин роҳ дар рушди матбуоти миллӣ саҳми намоён гузоштанд.

Март 11, 2019 19:48

Хабарҳои дигари ин бахш

Кэтрин Рассел, директори иҷроияи ЮНИСЕФ: «Мо мехоҳем, ки садои кӯдакон ва ҷавонон дар сиёсати иқлимӣ шунида шавад»
Ясмин Сиддиқӣ: «Обшавии пиряхҳо танҳо як мушкили муҳити зист нест, ин буҳрони об, ғизо ва рӯзгор аст»
Қоҳир Расулзода Конфронси байналмилалии сатҳи баланд оид ба ҳифзи пиряхҳоро натиҷагирӣ намуд
Шамс Аббосӣ: «Таҳти роҳбарии Эмомалӣ Раҳмон мардуми тоҷик дар самти мубориза бо тағйирёбии иқлим ва пешбурди донишҳои экологӣ қадамҳои бузург мегузоранд»
Султон Ҷамшед: «ВАО-и Тоҷикистон дар инъикоси кори конфронси сатҳи баланд муваффақ буд»
КОНФРОНСИ БАЙНАЛМИЛАЛИИ САТҲИ БАЛАНД ОИД БА ҲИФЗИ ПИРЯХҲО. Дар Душанбе масоили кунунии мониторинги пиряхҳо дар Осиёи Марказӣ баррасӣ шуд
Кристин Мишел: «Дар масъалаи тағйирёбии иқлим ва ҳифзи пиряхҳо давлатҳои ҷаҳон бояд муттаҳид бошанд»
Лидия Брито: «ЮНЕСКО Эъломияи Душанбе оид ба ҳифзи пиряхҳоро дастгирӣ намуда, ҳамеша дар паҳлуи ҷомеаи ҷаҳонӣ қарор мегирад»
КОНФРОНСИ БАЙНАЛМИЛАЛИИ САТҲИ БАЛАНД ОИД БА ҲИФЗИ ПИРЯХҲО. Дар рӯзи дуюм аз рӯйи шаш мавзуъ ҳамоишҳои канорӣ доир мегарданд
ДУШАНБЕ-МАРКАЗИ ҚАБУЛИ ҚАРОРҲОИ МУҲИМИ БАЙНАЛМИЛАЛӢ. Дар ҳошияи Конфронси байналмилалии сатҳи баланд оид ба ҳифзи пиряхҳо
Дар Душанбе хатари офатҳои табиии марбут ба пиряхҳоро баррасӣ намуданд
Дар доираи Конфронси байналмилалии сатҳи баланд оид ба ҳифзи пиряхҳо масоили об ва иқлим баррасӣ гардид