БАСКЕТБОЛ. Дастаи занонаи «Хоруғ-1» дар мусобиқаи вилоятӣ ҷои аввалро гирифт

ХОРУҒ, 09.03.2019  /АМИТ «Ховар»/. Бо ибтикори Раёсати кор бо ҷавонон ва варзиши Вилояти Мухтори Кӯҳистони Бадахшон дар толори Маҷмааи варзишӣ байни дастаҳои занона мусобиқаи вилоятӣ оид ба  баскетбол баргузор гардид. Сардори Раёсати ҷавонон ва варзиши вилоят Сураҷ Чоршанбиев гуфт, ки «мусобиқа се рӯз идома дошт ва дар он  шаш дастаи мунтахаб аз шаҳру ноҳияҳои вилоят ширкат намуданд. Дастаҳои мунтахаби Хоруғ -1 ва ноҳияи Шуғнон ба бозии ниҳоӣ роҳ ёфтанд. Дар бозии ҳалкунанда дастаи Хоруғ-1 бар дастаи ноҳияи Шуғнон пирӯз шуда, мақоми аввалро соҳиб шуд. Ҷои дуюму сеюмро ноҳияи Шуғнон ва  дастаи занони Хоруғ-2 ишғол карданд».

Ба ғолибони мусобиқа ҷом ва медалу ифтихорномаи Раёсати ҷавонон ва варзиши вилоят супурда шуд. Инчунин ба як гурӯҳ варзишгарон шаҳодатномаи номзад ба Устоди варзиши Ҷумҳурии Тоҷикистон тақдим гардид.

Сардори Раёсати ҷавонон ва варзиши вилоят гуфт, ки «дастаи занонаи волейбол беш аз 12 сол боз пай дар пай дар мусобиқаҳои ҷумҳуриявӣ ҷои аввалро ишғол мекунад. Тайи чанд соли охир  дастаи занонаи баскетбол низ рӯ ба рушд ниҳода, соли 2016 дар мусобиқаи ҷумҳуриявӣ ҷои якумро гирифт. Соли гузашта даста дар бозиҳои варзишии ҷумҳурӣ дар мақоми дуюм ҷо гирифт».