Дастаи мунтахаби олимпии Тоҷикистон аз бозиҳои финалии Чемпионати Осиё-2020 бенасиб монд

ДУШАНБЕ, 27.03.2018. /АМИТ «Ховар»/.  Дастаи мунтахаби олимпии Тоҷикистон аз бозиҳои финалии Чемпионати Осиё оид ба футбол, ки соли оянда дар Таиланд мегузаранд, дар канор монд. Ин дар ҳоле рух дод, ки дирӯз футболбозони кишварамон дар бозии охирини гурӯҳи «F» дар  шаҳри Тошканд вохӯриро бо мизбонони ин гурӯҳ-дастаи мунтахаби олимпии Ӯзбекистон бо натиҷаи мусовии 0:0 анҷом доданд.

Дар бозиҳои интихобии Чемпионати Осиё дар гурӯҳи «F»  дастаи мунтахаби Тоҷикистон дар вохӯрии аввал бар дастаи мунтахаби Ҳиндустон бо натиҷаи 2:0 ғалаба карда, дар маҷмӯъ соҳиби 4 имтиёз ва ҷои дуюм шуд.  Аммо шумораи голҳои ками олимпичиёни  тоҷик ба онҳо имкон надод, ки аз зинаи дуюм ба бозиҳои финалӣ роҳхат гиранд.

Дар баробари ин 4 дастаи хуштолеи гурӯҳҳо- Австралия, Эрон, Сурия ва Арабистони Саудӣ аз зинаи дуввум иштироки худро дар бозиҳои ниҳоии Чемпионати Осиё таъмин карданд.

Ҷадвали дастаҳои мақоми дуввум чунин шакл гирифт:

Дар ин раддабандӣ дастаҳои мунтахаби Эрон, Сурия ва Арабистони Саудӣ, ки бозиҳояшон баъди вохӯрии дастаҳои мунтахаби Ӯзбекистон ва Тоҷикистон (0:0) барпо гардид, барои худ натиҷаҳои мувофиқ ҳосил карданд (Ироқ – Эрон- 0:0, аз гурӯҳи “С”, Арабистони Саудӣ- АМА- 1:1, аз гурӯҳи “Д” ва Урдун – Сурия-1:1, аз гурӯҳи “Е”) .

Дар вақти холшуморӣ таносуби тӯбҳо ва  огоҳиҳо ба назар гирифта шуд ва дастаҳои мазкур аз  дастаи мунтахаби Тоҷикистон пеш гузаштанд.