Футбол: ҳамаи гурӯҳҳо дар Ҷоми Конфедератсияи футболи Осиё муайян шуданд

ДУШАНБЕ, 14.03.2019. /АМИТ «Ховар»/.  13 март бо баргузории ду вохӯрӣ дар минтақаҳои Осиёи Марказӣ ва Шарқӣ дар ҳамаи гурӯҳҳои Ҷоми Конфедератсияи Футболи Осиё дастаҳо мушаххас шуданд.

Дар Варзишгоҳи «20-солагии Истиқлолияти Тоҷикистон»-и шаҳри Хуҷанд дар бозии ҷавобии марҳилаи плей-оффи Ҷоми КФО-2019 байни дастаҳои «Хуҷанд» (Тоҷикистон) ва «Аҳал» (Туркманистон) натиҷаи мусовӣ- 0:0 ба қайд гирифта шуд ва «Хуҷанд» аз натиҷаи ду вохӯрӣ (1:1, бозии аввал) дар таърихи худ бори якум ба бозиҳои гурӯҳи «Д»-и мусобиқот роҳхат гирифт.

Дар минтақаи Осиёи Шарқӣ дастаҳои «Тай По»-и Гон-Конг ва «Риёмиёнг»-и Кореяи Шимолӣ дар ду вохӯрӣ ғолибро муайян накарданд ва натиҷаи 0:0 ба қайд гирифта шуд. Силсилаи зарбаҳои пеналтии баъдибозӣ «Тай По»-ро бо ҳисоби 5:3 ба бозиҳои гурӯҳӣ ҳидоят намуд.

Ба ҳамин тартиб дар мавсими футболи соли 2019  36 даста дар 9 гурӯҳ барои Ҷоми Конфедератсияи Футболи Осиё муборизаро идома медиҳанд. То ба имрӯз дар баъзе аз гурӯҳҳо ду даври бозиҳо баргузор шудаанд. Аз 3 апрел дар гурӯҳҳои минбаъда, аз ҷумла гурӯҳи «Д”, ки ду дастаи Тоҷикистон- «Истиқлол” ва « Хуҷанд” ширкат менамоянд, мусобиқа оғоз меёбад.  «Истиқлол» бо «Хуҷанд» ва “Алтин Асир”-и Тркманистон бо «Дордой»-и Қирғизистон бо ҳам қувва меозмоянд.