ҲХДТ дар шаҳри Турсунзода бо кӯдакони ятим Наврӯзи байналмилалиро ҷашн гирифт

ТУРСУНЗОДА, 20.03.2019 /АМИТ «Ховар»/. Бо дастгирии  Ҳизби Халқии Демократии Тоҷикистон дар шаҳри Турсунзода дар Хонаи кӯдакони шаҳр бо иштироки 102 нафар ятим ва омӯзгорон  Наврӯзи байналмилалӣ таҷлил гардид.

Тибқи иттилои директори муассисаи мазкур Рухсора  Ғафурова, бо ташаббуси  роҳбарияти ҲХДТ дар шаҳри Турсунзода дар ин ҷашни бошукӯҳ барои хурсанд намудани кӯдакони ятим дастархони идона ороста шуд ва барои онҳо хӯрокҳои миллӣ омода гардид. Ҳамчунин дастаҳои ҳаваскорон баҳри онҳо ҳунарнамоӣ карданд.

Раиси ҲХДТ дар шаҳри Турсунзода Моистон Азизова гуфт, ки вазифаи инсонии ҳар як фард аст, ки дар арафаи ҷашнҳо, хосса  иди Наврӯз ба хонаи ятимон омада, онҳоро табрик намоянд.

Хушбахтона, кӯдакони ятими ин муассиса зери назорати ҳамешагии роҳбарияти шаҳр қарор доранд.

Имрӯзҳо бахшида ба 30 -солагии Истиқлолияти давлатӣ дар шаҳр бинои муассисаи таълимӣ барои кӯдакони ятим сохта шуда истодааст, ки ояндаи наздик ба истифода дода мешавад.