Прокурори генералӣ дар иҷлосияи Маҷлиси миллӣ ҳисобот медиҳад

ДУШАНБЕ, 12.03.2019/АМИТ «Ховар»/. 29 марти соли равон дар шаҳри Душанбе иҷлосияи ҳаждаҳуми Маҷлиси миллии Маҷлиси Олии Ҷумҳурии Тоҷикистон  даъвати панҷум баргузор мегардад.

Тавре аз Палатаи болоии Парлумони мамлакат ба АМИТ «Ховар» иттилоъ доданд,  дар иҷлосия  Қонуни Ҷумҳурии Тоҷикистон «Дар бораи берун  баровардан ва ворид намудани сарватҳои таърихӣ», қонунҳо оид ба ворид намудани тағйиру иловаҳо ба Қонунҳои Ҷумҳурии Тоҷикистон «Дар бораи мубориза бар зидди  коррупсия», «Дар бораи масъулияти падару модар дар таълиму тарбияи фарзанд», «Дар бораи хизмати давалатӣ» ва дигар масъалаҳои марбут ба ҳаёти сиёсию иқтисодии  кишвар баррасӣ хоҳад гардид.

Инчунин дар ҷараёни иҷлосия  дар назди аъзои Маҷлиси миллӣ Прокурори генералии Ҷумҳурии Тоҷикистон «Дар бораи назорати  риояи дақиқ ва иҷрои якхелаи қонунҳо дар ҳудуди Ҷумҳурии Тоҷикистон» ҳисобот медиҳад.