Вазири рушди иқтисод ва савдои Тоҷикистон бо Директори генералии «Бандари баҳрии тиҷоратии байналмилалии Боку» мулоқот намуд

ДУШАНБЕ, 19.03.2019. /АМИТ «Ховар»/. Ҳафтаи сипаригашта дар ҳошияи сафар ба Ҷумҳурии Озарбойҷон ҷиҳати иштирок дар Форуми VII ҷаҳонии Боку боздиди Вазири рушди иқтисод ва савдои Ҷумҳурии Тоҷикистон Неъматулло Ҳикматуллозода аз Бандари баҳрии тиҷоратии байналмилалии Боку сурат гирифт.

Тавре аз Вазорати рушди иқтисод ва савдо ба АМИТ «Ховар» хабар доданд, зимни мулоқот бо Директори генералии Бандари мазкур Толеҳ Зиядов маълумоти муфассал оид ба фаъолияти он манзур гардида, пешниҳод карда шуд, ки имкониятҳои бандар барои ҳамлу нақли борҳои Тоҷикистон фаровон истифода бурда шаванд.

Бояд гуфт, ки Бандари баҳрии тиҷоратии байналмилалии Боку соли 2018 мавриди истифода қарор дода шудааст. Масоҳати он 117 гектарро ташкил дода, он дорои 12 киштигоҳ мебошад. Иқтидори бандари мазкур барои интиқоли борҳо дар як сол то 15 миллион тоннаро ташкил менамояд ва ҷиҳати истифодаи фарогир аз имкониятҳои бандар дар назди он минтақаи озоди иқтисодӣ бунёд шудааст. «Истифодаи бандар на танҳо барои интиқоли борҳо, балки барои таъмини ҳамкории бештари минтақавӣ саҳмгузор хоҳад буд»,-зикр намуд Т. Зиядов.