20 апрел ҳаракати воситаҳои нақлиёти автомобилӣ дар баъзе кӯчаҳои пойтахт муваққатан қатъ мегардад

ДУШАНБЕ, 18.04.2019./АМИТ «Ховар»/. Тавре қаблан иттилоъ додем, 20 апрели соли  равон   ба муносибати Рӯзи пойтахт  Ниммарафони Х байналмилалии Душанбе баргузор мегардад. Вобаста ба ин, Мақомоти иҷроияи ҳокимияти давлатии шаҳри Душанбе ба таваҷҷуҳи сокинон ва меҳмонони пойтахт мерасонад, ки ҳангоми баргузории Ниммарафон,  аз соати 08:00 то 11:00 ҳаракати воситаҳои нақлиёти автомобилӣ аз бурриши кӯчаҳои Саъдии Шерозӣ бо  Ҳофизи Шерозӣ ва аз буриши кӯчаи Ҳофизи Шерозӣ бо хиёбони Рӯдакӣ то буриши кӯчаи Бухоро  муваққатан  қатъ мегардад.

Тавре аз Раёсати иттилоот ва робитаҳои хориҷии дастгоҳи Раиси шаҳри Душанбе ба АМИТ «Ховар» хабар доданд,  дар ин бора қарори Раиси шаҳр ба тавсиб расидааст.

Тибқи қарори мазкур, Раёсати Вазорати корҳои дохилии Ҷумҳурии Тоҷикистон дар шаҳри Душанбе  вазифадор гардидааст, ки ҷиҳати таъмини ҳаракати воситаҳои нақлиёти автомобилӣ дар кӯчаҳои ҳамшафати макони баргузории Ниммарафон  ва бехатарии ҳаракати шаҳрвандон чораҳои мушаххаси мақсаднокро роҳандозӣ намояд.