Ҷавонони фаъол аз Китобхона ва Осорхонаи миллӣ дидан намуданд

ДУШАНБЕ, 05.04.2019. /АМИТ «Ховар»/. Бо ташаббуси Кумитаи иҷрояи ҲХДТ дар ноҳияи Исмоили Сомонӣ бахшида ба таҷлили сазовори Рӯзи пойтахт ва Рӯзи ҷавонони Тоҷикистон имрӯз сайри ҷавонон-аъзои фаъоли ТҶҶ «Созандагони Ватан»-и ноҳия ба Китобхона ва Осорхонаи миллии Тоҷикистон ташкил карда шуд. Аснои шиносоӣ ҷавонон аз тамошои  бахшҳои гуногуни ин махзани илму дониш ва ҷойгоҳи фарҳангу тамаддун ғизои маънавӣ бардошта, ба саволҳои сершумори худ посухҳои дақиқ гирифтанд.

Ҳадафи сайри мазкур огоҳии ҷавонон аз таъриху маънавиёт, баланд бардоштани завқи китобхонӣ, рӯ овардан ба арзишҳои миллӣ, шинохти  осори арзишманди шоирону адибон ва ба ин васила баланд бардоштани ҳисси ватандӯстию ватанпарастӣ ва худшиносию худогоҳии миллӣ буда, он  бахшида ба Солҳои рушди деҳот, сайёҳӣ ва ҳунарҳои мардумӣ доир гардид.

Ҳангоми боздид ҷавонон аз осори ниёгон, бозёфтҳои куҳани ҳунарҳои миллӣ, амсоли кулолгарӣ, заргарӣ, дуредгарӣ ва ғайраҳо шиносоӣ пайдо намуданд. Ҳамзамон ҷавонон бо Китобхонаи электронӣ ва китобҳои арзишманди Президенти Ҷумҳурии Тоҷикистон муҳтарам Эмомалӣ Раҳмон шинос гардиданд.