Дар озмуни «Сайри гули лола» Фурудгоҳи байналмилалии Кӯлоб сазовори ҷойи якум гардид

ДУШАНБЕ, 01.04.2019 /АМИТ «Ховар»/. Дар шаҳри Кӯлоб озмуни шаҳрии «Сайри гули лола» ҷамъбаст гардид. Фурудгоҳи байналмилалии Кӯлоб сазовори ҷойи якум, Оромгоҳи Мир Сайид Алии Ҳамадонӣ сазовори ҷойи дуюм, Бонки миллӣ дар шаҳри Кӯлоб ва ҶСК «Шабакаҳои барқи шаҳри Кӯлоб» сазовори ҷойи сеюм гардиданд.

Тавре аз Мақомоти иҷроияи ҳокимияти давлатии шаҳри Кӯлоб ба АМИТ «Ховар» хабар доданд,  дар асоси низомномаи озмун ташкилоту муассиса, корхона ва ҷамоатҳои деҳоти шаҳри Кӯлоб вазифадор гардиданд, ки дар доираи озмуни «Сайри гули лола» дар кӯчаю хиёбонҳои шаҳр, назди ташкилоту муассиса ва корхонаҳои худ гули лола, садбарг ва дигар гулҳои гуногуни мавсимӣ шинонанд.

Ҳайати гурӯҳи кории шаҳрӣ оид ба озмуни ҷумҳуриявии «Сайри гули лола» аз ҳолати воқеии корҳои анҷомдодашуда дидан намуда, озмунро ҷамъбаст намуд. Беҳтаринҳо аз рӯи шумораи истифодаи ҳарчи бештари намуди гулҳо, аз ҷумла гули лола, интихоби композитсияву дизайни ҷолиб, сифати кор ва ҳолати нашъунамо, ки аз дигарон бартарӣ доштанд, ғолиби озмун дониста шуданд.

Дар натиҷа маълум гардид, ки дар шаҳру деҳоти Кӯлоб то 29 марти соли равон  зиёда аз 23 ҳазор дона гули лола, зиёда аз 45 ҳазор дона гули садбарг ва 103 851 дона гулҳои мавсимӣ шинонида шуда, ба ҳусни шаҳр зиннату ороиш бахшидаанд.

Мавриди зикр аст, ки Озмуни ҷумҳуриявии «Сайри гули лола» бо мақсади татбиқи Амри Президенти Ҷумҳурии Тоҷикистон баҳри вусъат додани корҳои ободонӣ, бунёдкорию созандагӣ, тарбияи ҳисси хештаншиносӣ, ватандӯстӣ, ҷалби бештари сокинон ба корҳои ободонию сабзазоркунӣ, баланд бардоштани завқи эстетикӣ, зебошиносӣ, фарҳанги шаҳрдорӣ ва сатҳи маърифати экологии сокинон, тозагии муҳити зист ва бунёд намудани гулгаштҳо гузаронида мешавад.