Комроншоҳи Устопириён дар мусобиқоти Гран При Анталия соҳиби медали биринҷӣ гардид

ДУШАНБЕ, 08.04.2019. /АМИТ «Ховар»/. Паҳлавони шинохтаи  тоҷик Комроншоҳи Устопириён дар мусобиқоти Гран При Анталия соҳиби медали биринҷӣ гардид.

Тавре мухбири АМИТ «Ховар» Меҳрони Қурбон хабар медиҳад, дар мусобиқоти мазкур Комроншоҳ рақобатро аз даври дуюм шурӯъ намуд. Сараввал  паҳлавони тоҷик  бар   варзишгарони Молдавия Мокану Лурие  ва Эстония Калюлаид Клен Кристофер ғолид омад. Дар марҳилаи чорякниҳоӣ Комроншоҳ аз рақиби гурҷии худ Чрикишвили Автандили, ки дар раддабандии вазни 90 кг мақоми 45-умро соҳиб мебошад, ғайриинтизор мағлуб гардид. Аммо бо ин нокомиаш Комроншоҳ мусобиқаро тарк нанамуд ва ба марҳилаи дигар гузашт. Дар ин марҳила варзишгари тоҷик бар ду ҳарифи худ- Ягор Варапаев  ва  Голан Итай дастболо гардида, сазовори медали биринҷӣ  шуд.

Ёдовар мешавем, ки  Комроншоҳи Устопириён   дар мусобиқоти Гран При Анталия бори сеюм аст, ки    соҳиби медали ифтихорӣ мегардад. Қаблан соли 2017 дар ҳамин мусобиқот соҳиби медали нуқра шуда, соли 2018 чемпиони мусобиқоти Гран При Анталия гардида буд.