«Масъалаҳои мубрами Шарқи Наздик ва Миёна: раванди сулҳофаринӣ ва мубориза бо терроризм»-таҳти чунин унвон Конференсияи байналмилалии илмӣ доир мегардад

ДУШАНБЕ, 01.04.2019 /АМИТ «Ховар»/. 18 июни соли 2019 дар шаҳри Душанбе таҳти унвони «Масъалаҳои мубрами Шарқи Наздик ва Миёна: раванди сулҳофаринӣ ва мубориза бо терроризм» Конференсияи байналмилалии илмӣ бо иштироки олимону муҳаққиқон аз давлатҳои Германия, Туркия, Афғонистон, Эрон ва Амороти Муттаҳидаи Араб баргузор мегардад.

Институти омӯзиши масъалаҳои давлатҳои Осиё ва Аврупои Академияи илмҳои Ҷумҳурии Тоҷикистон аз ташкилкунандагони асосии ҳамоиши байналмилалӣ ба шумор меравад.

Дар ин бора директори Институти мазкур Ёрмуҳаммад Ниёзӣ ба хабарнигори АМИТ «Ховар» хабар дод.

Ба иттилои манбаъ, дар конференсия масъалаҳои «Таҷрибаи сулҳи Тоҷикистон ҳамчун модели сулҳофаринӣ барои кишварҳои буҳронзада», «Раванди сулҳофаринӣ дар кишварҳои буҳронзадаи Афғонистон, Сурия, Ироқ, Фаластин, Яман», «Нақши қудратҳои ҷаҳонӣ ва минтақавӣ дар ташкили музокироти сулҳи Афғонистон», «Ҷараёни ҳамкории кишварҳои абарқудрат ва минтақавӣ дар раванди сулҳофаринӣ дар кишварҳои буҳронии Шарқи Наздик», «Ҳамкории мутақобилаи кишварҳои минтақа ва таҷрибаи мавҷуда алайҳи терроризм ва экстремизм», «Мақом ва ҷойгоҳи СММ дар раванди сулҳофаринӣ дар ҷаҳони муосир», «Омилҳои дохилӣ ва берунаи низоъ дар кишварҳои Шарқи Наздик: мушкилоти шинохт ва ташхиси он», «Таҷрибаи миллии Тоҷикистон дар самти муқовимат бо экстремизм ва терроризм дар шароити муосир», «Сиёсати кишварҳои минтақаи Осиёи Марказӣ дар самти ҳалли низоъҳои дохилии давлатҳои ҷангзадаи Шарқи Наздик», «Ҷойгоҳи созмонҳои ҷаҳонӣ ва минтақавӣ, аз қабили СКИ, СҲШ, СААД, ИДМ ва ғайра дар ҳалли низоъ ва муқовимат бо экстремизм ва терроризм» мавриди муҳокима қарор мегиранд.