Пагоҳ барномаи ҷумҳуриявӣ зери шиори «Фарогирии умумӣ ба хизматрасонии тиббӣ» доир мегардад

ДУШАНБЕ, 5.04.2019. /АМИТ «Ховар»/. Бахшида ба Рўзи умумиҷаҳонии саломатӣ пагоҳ, 6 апрели соли равон  аз соати 8.00 то соати 12.00 дар Муассисаи давлатии «Пажӯҳишгоҳи гастроэнтерологияи Ҷумҳурии Тоҷикистон»-и шаҳри Душанбе  бо иштироки устодону профессорон ва мутахассисони баландпояи соҳавӣ барномаи ҷумҳуриявӣ зери шиори «Фарогирии умумии аҳолӣ ба хизматрасонии тиббӣ» баргузор мегардад.

Тавре ба АМИТ «Ховар» аз Вазорати тандурустӣ ва ҳифзи иҷтимоии аҳолии Ҷумҳурии Тоҷикистон  хабар доданд, дар ҷараёни амалишавии ин барнома, ки инчунин дар вилояту шаҳру ноҳияҳо доир  мегардад, ҷиҳати пешгирии бемориҳо дар байни аҳолӣ дар тамоми муассисаҳои тиббии кишвар аз ҷониби мутахассисони баландпояи соҳаҳои гуногуни тиб машварат, муоина ва дигар ташхисҳо ба таври ройгон анҷом дода мешаванд.

Ёдовар мешавем, ки бо ташаббуси Ташкилоти Умумиҷаҳонии Тандурустӣ (ТУТ)   дар саросари ҷаҳон ҳамасола 7 апрел    Рӯзи умумиҷаҳонии саломатӣ таҷлил карда мешавад. Бахшида ба ин сана  ҳамасола   дар тамоми муассисаҳои саломатӣ «Рӯзи дарҳои кушод» эълон мешавад.