Таэквондочиёни тоҷик дар шаҳри Алмаатои Қазоқистон сазовори се медали тилло шуданд

ДУШАНБЕ, 15.04.2019 /АМИТ «Ховар»/. Варзишгарони шинохтаи тоҷик дар 2-юмин  мусобиқаи байналмилалӣ оид ба таэквондои ҷаҳонӣ миёни кӯдакон, наврасон ва ҷавонон дар шаҳри Алмаатои Қазоқистон соҳиби се медали тилло гардиданд.

Тавре  раиси Федератсияи таэквондо (WT)-и Тоҷикистон Ҷаҳонзеб Қармишев ба мухбири АМИТ «Ховар»  хабар дод,  мусобиқаи мазкур ба ифтихори ҷашни  Наврӯзи хуҷастапай аз 12 то 14 апрели соли равон бо иштироки варзишгарони кишварҳои Осиёи Марказӣ – Тоҷикистон, Қазоқистон, Қирғизистон ва Ӯзбекистон доир гардид.

Ба иттилои номбурда,  дар мусобиқаи мазкур аз Ҷумҳурии Тоҷикистон се варзишгар иштирок карда, соҳиби се медали тилло шуданд. Муниса Ойматова дар вазни -49 кг миёни духтарон, Абубакр Фатҳуллоев дар вазни -49 кг миёни писарон ва Алиҷон Фатҳуллоев дар вазни -26 кг миёни кӯдакон ғолиби мусобиқа гардиданд.

Бояд зикр кард, ки варзишгарони тоҷик дар мусобиқаи мазкур таҷрибаи иштирок дар мусобиқаҳои байналмилалиро гирифтанд ва зери роҳбарии мураббӣ Шамс Қодиров барои иштирок дар мусобиқаҳои рейтингӣ омодагӣ мебинанд.