Вазирони мудофиаи кишварҳои ИДМ 5 май дар Россия мулоқот мекунанд

ДУШАНБЕ, 09.04.2019. /АМИТ «Ховар»/. Вазирони мудофиаи давлатҳои аъзои Иттиҳоди Давлатҳои Мустақил 5 май дар Федератсияи Россия мулоқот менамоянд. Тавре АМИТ «Ховар» хабар медиҳад, дар ин бора рӯзи ҷумъа раиси Кумитаи иҷроия – котиби иҷроияи ИДМ Сергей Лебедев изҳори назар кард.

«5 май дар Россия мулоқоти вазирони мудофиаи кишварҳои ИДМ баргузор мешавад», — гуфт Лебедев.

Ӯ ҳамчунин иттилоъ дод, ки аллакай дар ояндаи наздик баргузории як зумра чорабиниҳо таҳти сарпарастии ИДМ, аз ҷумла вохӯрии сарони ҳукуматҳо дар назар аст. «31 май дар шаҳри Ашқобод ҷаласаи Шӯрои сарони ҳукуматҳои ИДМ доир мегардад. Дар нимаи моҳи май дар шаҳри Душанбе мулоқоти роҳбарони хадамоти махсуси мо баргузор мешавад, — хабар дод Лебедев. – Тақрибан баъди ду ҳафта ҷаласаи баҳории Ассамблеяи байнипарлумонии ИДМ баргузор мегардад ва дар он ҳайати парлумони Ӯзбекистон иштирок хоҳад кард, ки чанде пеш ба он ҳамроҳ шуд».

Ба гуфтаи ӯ, ҳамчунин 15-16 май дар Ашқобод Форуми зиёиёни илмию эҷодии кишварҳои ИДМ баргузор мешавад.