Дар Тошканд ҷаласаи навбатии Шӯрои вазирони корҳои дохилии ИДМ баргузор гардид

ДУШАНБЕ, 31.05.2019 /АМИТ «Ховар»/. Имрӯз дар шаҳри Тошканди Ҷумҳурии Ӯзбекистон ҷаласаи навбатии Шӯрои вазирони корҳои дохилии давлатҳо — иштирокчиёни аъзои ИДМ баргузор гардид. Дар ҷаласаи мазкур Вазирони корҳои дохилии Ҷумҳурии Арманистон Валерий Осипян, Ҷумҳурии Озарбойҷон Усубов Рамил Идрис оғлу, Ҷумҳурии Беларус Шуневич Игор Анатолевич, Ҷумҳурии Қазоқистон Тургумбаев Ерлан Заманбекович, Ҷумҳурии Қирғизистон Джунушалиев Кашкар Астаканович, Федератсияи Россия Колоколсев Владимир Александрович, Ҷумҳурии Тоҷикистон Рамазон Раҳимзода, Ҷумҳурии Ӯзбекистон Пулат Бобожонов, муовини Вазири корҳои дохилии Ҷумҳурии Туркманистон О.Г.Ходжаниязов, директори Бюрои ҳамоҳангсозии мубориза бар зидди ҷиноятҳои муташаккил ва дигар намуди ҷиноятҳои хавфнок дар ҳудуди ИДМ (БКБОП) Олег Коновалов, намояндаи Шӯрои Вазирони корҳои дохилӣ дар назди Кумитаи иҷроияи ИДМ ва дигар шахсони расмӣ иштирок намуданд.

Тавре аз Вазорати корҳои дохилии Ҷумҳурии Тоҷикистон  ба АМИТ «Ховар» хабар доданд, дар ҷаласаи Шӯро дурнамои ҳамкории афзалиятноки вазоратҳои корҳои дохилии ИДМ, амалӣ намудани барномаҳои байнидавлатии мубориза бар зидди ҷинояткорӣ, инчунин як зумра масъалаҳои мубрами ҳамкории Вазоратҳои корҳои дохилии (политсияи) давлатҳо — иштирокчиёни аъзои ИДМ  мавриди баррасӣ қарор гирифтанд.

Ҳамчунин Консепсияи ҳамкории Вазоратҳои корҳои дохилии (политсияи) давлатҳо — иштирокчиёни аъзои ИДМ  дар давраи то соли 2030, ки бо ташаббуси Бюрои ҳамоҳангсозии мубориза бо ҷиноятҳои муташаккил ва дигар намуди ҷиноятҳои хавфнок дар ҳудуди ИДМ пешниҳод гардид, мавриди баррасӣ қарор дода шуд.

Инчунин лоиҳаи Созишнома оид ба ҳамкории давлатҳо — иштирокчиёни аъзои ИДМ вобаста ба масъалаҳои барасмиятдарории шаҳодатномаи бозгардонидани шахсоне, ки бояд маҷбуран хориҷ карда шаванд, муҳокима гардида, дар ин радиф як қатор таклифу пешниҳодҳои судманд  баён  гардид.

 Дар ҷаласаи Шӯрои вазирони корҳои дохилии давлатҳо — иштирокчиёни аъзои ИДМ Вазири корҳои дохилии Ҷумҳурии Тоҷикистон Рамазон Раҳимзода вобаста ба ҷараёни татбиқи Қарори Шӯрои вазирони корҳои дохилӣ аз 20-уми июли соли 2018 «Оид ба рафти коркарди лоиҳаи ҳуҷҷат, танзимкунандаи тартиби ягонаи гузаронидани таҳвили назоратшавандаи байналмилалӣ бо дархости мақомоти корҳои дохилии (политсияи) давлатҳо — иштирокчиёни аъзои Иттиҳоди Давлатҳои Мустақил» муфассал баромад намуда, як  зумра  таклифу пешниҳодҳои судманд баён намуд.

Дар идомаи ҷаласаи Шӯрои мазкур ҳамчунин қоидаҳои гузаронидани маҷмӯи чорабиниҳои мувофиқашуда ё якҷояи оперативӣ-профилактикии Вазоратҳои корҳои дохилии (политсияи) давлатҳо — иштирокчиёни аъзои ИДМ  мавриди баррасӣ ва муҳокимарониҳо қарор дода шуд.

Дар рафти ҷаласа ҳамчунин доир ба масъалаҳои ҳамкории афзалиятноки дуҷониба ва бисёрҷониба дар самти мубориза бо терроризму экстремизм ва дигар таҳдиду хатарҳои замони муосир муҳокимарониҳо сурат гирифта, қарорҳои дахлор қабул карда шуд.

Ба иттилои манбаъ, айни замон, Шӯрои вазирони корҳои дохилии давлатҳо — иштирокчиёни аъзои ИДМ дар шаҳри Тошканд идома дошта, аз ҷараёни он иловатан иттилоъ дода мешавад.