Чемпионати Осиё: шоҳмотбози тоҷик Рухшона Саидова сазовори медали биринҷӣ шуд

ДУШАНБЕ, 21.06.2019. /АМИТ «Ховар»/. 20 июни соли равон  дар шаҳри Тошканди Ҷумҳурии Ӯзбекистон Чемпионати Осиё оид ба шоҳмот миёни наврасон ва ҷавонон расман ифтитоҳ гардид. Дар рӯзи аввали мусобиқа узви дастаи мунтахаби Ҷумҳурии Тоҷикистон Саидова Рухшона  дар шоҳмоти зудбозӣ (рапид) миёни ҷавондухтарони 15 сола ба гирифтани мақоми сеюм шарафёб гардид.

Тавре аз Кумитаи кор бо ҷавонон ва варзиши назди Ҳукумати Ҷумҳурии Тоҷикистон ба  АМИТ «Ховар»  хабар  доданд, дар  ин чемпионат 187 нафар шоҳмотбоз аз 16 давлати  Осиё миёни ҳам рақобат менамоянд, ки дар қатори  онҳо шоҳмотбозони тоҷик низ иштирок доранд.

Тибқи иттилои манбаъ,  дар ин чемпионат Ҷумҳурии Тоҷикистонро дастаи мунтахаби Тоҷикистон  оид ба шоҳмот намояндагӣ карда,  дар рӯзи аввали  бозӣ наврасони тоҷик ба гирифтани мақомҳои ифтихорӣ шарафёб гардиданд.

Чемпионати мазкур  29 июн ҷамъбаст гардида, ғолибони он  имкони иштирок дар Чемпионати ҷаҳон оид ба шоҳмотро пайдо менамоянд.