ФУТБОЛ: Бозии дӯстонаи дастаҳои мунтахаби Тоҷикистон ва Афғонистон мусовӣ анҷом ёфт

ДУШАНБЕ, 08.06.2019. /АМИТ «Ховар»/.  Шоми дирӯз бозии дӯстона ва таҷрибавӣ миёни дастаҳои мунтахаби футболи Тоҷикистон ва Афғонистон дар Варзишгоҳи марказии ҷумҳуриявии шаҳри Душанбе баргузор гардида, бо ҳисоби мусовии 1:1 ба поён расид.

Ҳисоб дар дақиқаи 72-юм аз ҷониби Умрон Ҳайдарӣ кушода шуд. Ӯ бо усули зебои пушти пой тӯбро вориди дарвоза кард. Голи ҷавобиро ҳамлагари ҷавони дастаи мунтахаби  мамлакат Шаҳром Самиев дар дақиқаи 88-ум ба самар расонид.

Аввалин маротиба ба футболбозони дастаи мунтахаби Афғонистон муяссар шуд, ки баъди шаш бохт бо дастаи мунтахааби Тоҷикистон баробар бозӣ кунанд ва ба натиҷаи мусовӣ расанд.

Бозии дӯстонаи дастаҳои мунтахаби Тоҷикистон ва  Афғонистон оғози  давраи омодагӣ ба марҳилаи гурӯҳии Чемпионати ҷаҳон-2022 ба ҳисоб меравад.

Бозии дӯстона

Тоҷикистон – Афғонистон – 1:1

Голҳо: Умрон Ҳайдарӣ, 72 (0:1). Шаҳром Самиев, 88 (1:1).

Тоҷикистон: Рустам Ятимов, Сиёвуш Асроров, Хуршед Бекназаров (Табрези Давлатмир, 72), Аҳтам Назаров, Искандар Ҷалилов, Амирбек Ҷӯрабоев, Мухаммадҷон Раҳимов, Комрон Турсунов (Шарафҷон Солеҳов, 46), Эҳсони Панҷшанбе, Парвизҷон Умарбоев (Шериддин Бобоев, 85), Ҷаҳонгир Эргашев (Шаҳром Самиев, 56).

Афғонистон: Файсал Ҳамиди, Ҳорун Амирӣ, Давид Наҷим, Адам Наҷим, Нур Ҳусен (Наим Раҳимӣ, 84), Умрон Ҳайдарӣ (Зулфи Назарӣ, 75), Фаршод Нур, Наҷим Ҳайдарӣ, Файсал Шоиста (Бенжамин Наҷим, 88), Фарид Содот (Ҷабор Шарза, 46), Шариф Муҳаммад.

огоҳӣ: Файсал Шоиста (Афғонистон).

Довар дар майдон: Насрулло Кабиров (Тоҷикистон).

7 июн. Душанбе. Варзишгоҳи марказии ҷумҳуриявӣ. 13 500 тамошобин.