ДУШАНБЕ, 31.07.2019. /АМИТ «Ховар»/. Рӯзи шанбеи 3 август,  соати 10:00,  бахшида ба Солҳои рушди деҳот, сайёҳӣ ва ҳунарҳои мардумӣ дар Боғи «Куруши Кабир» Фестивали яхмос ва обҳои ташнагишикан доир мегардад.

Фестивали мазкурро Вазорати  саноат ва технологияҳои нави Ҷумҳурии Тоҷикистон дар якҷоягӣ бо  Мақомоти иҷроияи ҳокимияти давлатии шаҳри Душанбе  бо мақсади иҷрои банди 26 «Ҷадвали баргузории фестивал, намоиш, ид ва озмунҳои анъана ва ҳунарҳои мардумӣ дар Ҷумҳурии Тоҷикистон барои солҳои 2019-2021»,  ки бо Амри Президенти Ҷумҳурии Тоҷикистон аз 13 декабри соли 2018  тасдиқ шудааст,  баргузор менамояд.

Тавре аз Вазорати мазкур ба АМИТ «Ховар» хабар доданд, дастгирӣ намудани корхонаҳои истеҳсолкунандаи ватанӣ, тарғиби маҳсулоти онҳо ва муаррифии маконҳои сайёҳии пойтахти кишвар-шаҳри Душанбе аз мақсадҳои дигари Фестивал ба шумор меравад.

Меҳмонон ва сокинон дар фестивал имконият пайдо мекунанд, ки бо омода кардани яхмосҳои дӯстдоштаи худ аз наздик шинос шуда, онро истеъмол кунанд.

Яхмос — рамзи хушбахтии кӯдакист. Ин ширинии яхбаста ҳамеша барои кӯдакон ва бисёри калонсолон яке аз анвоҳои лазиз ва дӯстдошта буд ва хоҳад монд.  Таърихи ихтирои ин ширинии машҳур аз давраҳои тамаддунҳои қадимтарини Осиё — Чин ва Мовароуннаҳр сарчашма мегирад. Искандари Мақдунӣ, Наполеон ва Ҷорҷ Вашингтон яхмосро меписандиданд ва якчанд нафар барои он гувоҳномаи муаллифӣ (патент) гирифтанд.

Аз рӯи сарчашмаҳо, таърихи яхмос зиёда аз 5000 солро дар бар мегирад. Ҳанӯз 3000 пеш аз милод сарватмандони Чин  шириниҳои ба яхмос монанд истеъмол мекарданд. Онҳо барф, ях ва пораи афлесун, лимӯ ва тухми анорро бо ҳам омехта, яхмос омода мекарданд. Ҳатто Императори чинӣ Тангу дастурамали шахсии худро дар бораи тарзи омода намудани яхмос аз ях ва шир таҳия намуда буд. Дастурамал ва тарзу усулҳои омода кардани яхмос махфӣ нигоҳ дошта мешуд ва танҳо он дар асри 11 то мелод ба воситаи китоби «Шикинг» ошкор карда шуд.

То имрӯз намудҳои гуногуни ин ширинии яхбаста новобаста аз фасли сол пешкаши дӯстдорони он гардонида мешаванд. Истеҳсолгарони яхмос низ мунтазам дар ҷустуҷӯ буда, ин анвои дӯстдоштаро бо шаклу таъми гуногун ва истифодаи меваҳо пешниҳод менамоянд. Дар баробари лазиз будан, он инчунин ба саломатии шахс фоидаовар ба шумор меравад. Ҳанӯз асосгузори илми тиб Гиппократ (солҳои 460-370 пеш аз мелод) барои мустаҳкам кардани саломатӣ  истеъмоли яхмосро тавсия дода буд.

Ба иттилои манбаъ, дар доираи фестивал инчунин намоиш ва фурӯши маҳсулоти истеҳсоли корхонаҳои ватанӣ  ба нақша гирифта шудааст.

Мавҷуда АНВАРӢ,
АМИТ «Ховар»