Шоми имрӯз Баҳодур Усмонов бо варзишгари қазоқистонӣ рақобат мекунад

ДУШАНБЕ, 19.07.2019 /АМИТ «Ховар»/. Шоми имрӯз  чемпиони Осиё оид ба бокс Баҳодур Усмонов бо варзишгари қазоқистонӣ  Зокир Сафиулен дар даври нимниҳоӣ барои дарёфти «Ҷоми Президенти Қазоқистон» вориди рақобат мегардад. Дар ин бора аз Кумитаи кор бо ҷавонон ва варзиши назди Ҳукумати Ҷумҳурии Тоҷикистон ба АМИТ «Ховар» хабар доданд.

Ба иттилои манбаъ, Мусобиқаи байналмилалии «Ҷоми Президенти Қазоқистон» оид ба бокс  14 июл оғоз шуда, то  21 июл дар шаҳри Нур- султон  идома меёбад. Дар он  беш аз 150 нафар   варзишгарон аз 13 давлати дунё иштирок доранд.

Ёдовар мешавем, ки варзишгари маъруфи тоҷик Баҳодур Усмонов дар ин мусобиқа дар даври аввал бинобар сабаби аз бозӣ даст кашидани варзишгари гурҷистонӣ ба марҳилаи дигар роҳхат пайдо намуд.  Дар даври дигар Баҳодур бо ҳисоби 5-0 бар варзишгари қазоқ Дилмурод Неҷидов ғолиб омада,  ба даври нимниҳоӣ роҳхат пайдо намуд.