Ба пешвози Рӯзи варзишгарон. Дар Шуғнон Мусобиқаи ҷумҳуриявӣ аз намуди киёкушинкай баргузор гардид

Август 8, 2019 16:31

ХОРУҒ, 08.08.2019 /АМИТ «Ховар»/. Бахшида ба Рӯзи варзишгарон дар толори варзишии  муассисаи таҳсилоти миёнаи умумии рақами 11, ба номи нахустгенерали тоҷик Мастибек Тошмуҳаммедови Ҷамоати деҳоти Поршиневи ноҳияи Шуғнон байни наврасону ҷавонон Мусобиқаи  ҷумҳуриявӣ аз намуди киёкушинкай баргузор гардид.  Дар мусобиқа 8 даста ва 120 нафар варзишгарон  аз вилоятҳои Суғду Хатлон, Кӯҳистони Бадахшон ва шаҳру ноҳияҳои тобеи марказ ширкат доштанд.

Раиси ноҳияи Шуғнон Азиз Гиёҳзода варзишгарони наврас, мураббиёну доварони мусобиқаро ба яке аз калонтарин деҳоти вилоят-Ҷамоати деҳоти Поршинев хайру мақдам гуфта, барои ҳар яки онҳо пирӯзӣ таманно намуд.

“Ин мусобиқа дар доираи Солҳои рушди деҳот, сайёҳӣ ва ҳунарҳои мардумӣ  доир мегардад ва ҳадафи он  ба ҳам  наздик овардани инфрасохтори деҳоту шаҳр мебошад. Маҳз бунёди чунин толори зебо ба мо имконият дод, ки ин гуна мусобиқаи бонуфузи ҷумҳуриявиро дар ин деҳа баргузор кунем. Ин мусобиқа барои такмили истеъдоди варзишгарони наврас кумаки беандоза мерасонад ва  аз сӯи дигар,  чунин дидору гуфтугӯҳои мустақим кӯдакону наврасонро бештар  ба ҳам наздик мекунад”,-баён дошт Раиси ноҳияи Шуғнон.

Киёкушинкай агарчӣ барои Тоҷикистон як намуди нави варзишӣ аст, аммо дар муддати кӯтоҳ  байни кӯдакону наврасон ва ҷавонон маҳбубияти хос пайдо кард. Зеро ин намуди варзиш мафҳуму маъно ва тарзу услҳои   басо ҷолиб дорад. Маънои калимаи киёкушинкай  «омезиши рӯҳу тан» мебошад.

Раиси Федератсияи киёкушинкайи Ҷумҳурии Тоҷикистон Ҳикмат Кароматов, ки барои омӯзиш ва тамрини ин намуди варзиш ба давлатҳои мухталифи ҷаҳон, аз ҷумла Россия, Японияву Эрон сафар кардааст ва дар натиҷаи заҳмату талошҳои пайваста соҳиби дани панҷум ва унвони “шхана” гардидааст, баён дошт, ки  “киёкушинкай яке аз он намудҳои варзиш аст, ки рафтору кирдори бадро намеписандад ва моҳияти он тарғиби оини ҷавонмардӣ ва риояи  одобу ахлоқи инсонӣ  аст. Шиори он «Тавоно бувад, ҳар кӣ доно бувад» аст. Аз ин рӯ  ҳайати шахсии аксари сохторҳои интизомию низомии мамлакат низ ба тамрини ин намуди варзиш машғул мебошанд”.

Мактаби киёкушинкайи  Тоҷикистон   на танҳо дар Осиёи Марказӣ, балки дар тамоми ҷаҳон мақому манзалат пайдо кардааст. Дар минтақаи Осиёи Марказӣ танҳо як унвондори “шион”  аст, ки он ҳам аз Тоҷикистон аст. Теъдоди доварони сатҳи байналмилалӣ дар муқоиса бо кишварҳои дигар аз давлати мо бештар аст, ки ин ҳам яке аз нишонаҳои рушди киёкушинкай дар Ҷумҳурии Тоҷикистон мебошад.

Ҷои ифтихор аст, ки варзишгарони тоҷик соли равон дар Ҷоми ҷаҳон оид ба ин намуди варзиш соҳиби чор медали тилло гардиданд. Ҳоло варзишгарони тоҷик ба мусобиқаи ҷаҳонӣ, ки моҳи декабри соли равон дар ҷумҳурии Қазоқистон баргузор мегардад, омодагӣ мебинанд.

Ғолибони озмун бо медал, ифтихорномаву туҳфаҳои хотиравӣ қадрдонӣ шуданд.

 

Август 8, 2019 16:31

Хабарҳои дигари ин бахш

Ҳайати олимпии Тоҷикистон дар маросими ифтитоҳи Бозиҳои 5-уми ҳамбастагии исломӣ иштирок намуд
10 АВГУСТ-РӮЗИ ВАРЗИШГАРОНИ ТОҶИКИСТОН. Бахшида ба ин сана дар мамлакат Даҳаи мусобиқоти ҷумҳуриявӣ баргузор мегардад
ОЛИМПИАДАИ ШОҲМОТ. Дастаи мунтахаби Тоҷикистон пеш аз даври охирин дар раддабандии беҳтарин дастаҳои ҷаҳон дар ҷойи 65-ум қарор дорад
ЧЕМПИОНАТИ CAFA-2022. Тоҷикистон пас аз ду пирӯзӣ бо шаш имтиёз дар зинаи аввал аст
Дар нахустин Чемпионати минтақавии Осиёи Марказӣ оид ба бадминтон ҳайати дастаи мунтахаби Тоҷикистонро 12 нафар намояндагӣ мекунанд
Имрӯз дар Душанбе бозиҳои даври сеюми Чемпионати CAFA-2022 миёни дастаҳои мунтахаби ҷавонони то 19-сола доир мешаванд
ОЛИМПИАДАИ ШОҲМОТ ДАР ҲИНДУСТОН. Дастаи мардонаи Узбекистон дар ҷадвали мусобиқа пешсаф шуд, дастаи мунтахаби Тоҷикистон дар ҷои 77-ум қарор дорад
ДЗЮДО. Ҳафт нафар паҳлавонони ҷавони тоҷик дар Чемпионати ҷаҳон дар Эквадор ширкат меварзанд
АҲСАН! Сомон, Шодмон ва Темур аз Чемпионати Осиё оид ба гӯштини дзюдо бо медал бармегарданд
ТЕННИС. Ғолибони Мусобиқаи 12-уми байналмилалӣ барои дарёфти Ҷоми Президенти Ҷумҳурии Тоҷикистон муайян шуданд
ЧЕМПИОНАТИ CAFA-2022. Дастаи ҷавонони Тоҷикистон (U-19) мусобиқаро бо пирӯзии калон бар дастаи Афғонистон оғоз кард
ЧЕМПИОНАТИ ОСИЁ ОИД БА ГӮШТИНИ ДЗЮДО. Варзишгарони тоҷик Шодмон Ризоев ва Сомон Маҳмадбеков медалҳои нуқра ва биринҷӣ ба даст оварданд

Маводҳои таҳлилӣ