Форум ва Намоишгоҳи байналмилалии сайёҳии «Душанбе-2019»- муаррифи имкониятҳои сайёҳии Тоҷикистон

ДУШАНБЕ, 05.08.2019/АМИТ  «Ховар»/. Рӯзҳои 8-10 августи соли равон пойтахти Ҷумҳурии Тоҷикистон- шаҳри Душанбе мизбони  Форум  ва Намоишгоҳи  байналмилалии сайёҳии «Тоҷикистон -2019» мегардад. 

Ин форуми сатҳи баланд дар доираи Солҳои рушди деҳот, сайёҳӣ ва ҳунарҳои мардумӣ доир гардида,  ҳадафаш  рушди ҳамкорӣ дар бахши сайёҳии байналмилалӣ,  муаррифии  имкониятҳои сайёҳии  Тоҷикистон ва ҷалби сармояи хориҷӣ барои  рушди инфрасохтори соҳаи сайёҳии мамлакат мебошад.

Аз Кумитаи рушди сайёҳии назди Ҳукумати Ҷумҳурии Тоҷикистон ба АМИТ  «Ховар» иттилоъ доданд, ки   дар Форум  аъзои Ҳукумат, Парлумони Тоҷикистон,  роҳбарону намояндагони вазорату идораҳои мамлакат, созмонҳои байналмилалӣ, аз ҷумла,  Созмони ҷаҳонии  сайёҳӣ, роҳбарони  ширкатҳои  сайёҳии ватанию хориҷӣ ва олимону коршиносони бахши сайёҳӣ иштирок менамоянд.

Форуми байнамилалӣ дар чор бахш –ҷалби  сармоя ба инфрасохтори  сайёҳӣ,   сайёҳӣ –омили  муҳими густариши робитаҳо, сайёҳии экологӣ, кӯҳнаварадӣ ва таърихию фарҳангӣ, сайёҳии табобатию солимгардонию рекреатсионӣ, рушди ҳунарҳои мардумӣ   ва пайомадҳои  иқтисодии он  баргузор гардида, иштирокдорон масъалаҳои муҳими марбут ба рушди соҳаи туризм ва инфрасохтори он, тақвияти ҳамкории байналмилалии сайёҳиро баррасӣ менамоянд.

Дар доираи баргузории Форуми байналмилалии сайёҳӣ дар Боғи  фарҳангию фароғатии «Куруши Кабир»  Намоишгоҳи байналмилалии сайёҳӣ гузаронида мешавад, ки дар он имкониятҳо ва дастовардҳои сайёҳии сарзаминамон муаррифӣ  мегардад.

Инчунин интизор меравад, ки иштирокчиёни Форуми байналмилалӣ  бо мақсади   шиносоӣ бо фарҳангу  тамаддун, таърихи бостонию муосири  тоҷикон ва манзараҳои нотакрори табиати Тоҷикистон аз Қалъаи Ҳисор, чойхонаи «Харбуза», ангурзори  шаҳри Турсунзода, Неругоҳи барқи обии Норак, мавзеъҳои сайёҳию истироҳатии Варзоб, «Кохи Наврӯз», Боғи «Куруши Кабир, «Осорхонаи  миллии Тоҷикистон» ва Боғи Парчами Тоҷикистон боздид намоянд.